कुडाळ-मालवण तालुक्यात पाच नवीन आरोग्य उपकेंद्र

कुडाळ-मालवण तालुक्यात
पाच नवीन आरोग्य उपकेंद्र
२ कोटी ८० लाख निधी मंजूर
सकाळ वृत्तसेवा
कुडाळ, ता. २४ ः कुडाळ-मालवण तालुक्यातील ५ नवीन आरोग्य उपकेंद्रांच्या बांधकामासाठी १५ व्या वित्त आयोगाअंतर्गत २ कोटी ८० लाख रुपयांचा निधी मंजूर झाला आहे. हा निधी मंजूर केल्याबद्दल राज्याचे सार्वजनिक आरोग्य व कुटुंब कल्याण मंत्री प्रकाश आबिटकर यांचे आमदार निलेश राणे यांनी आभार मानले. या निधीमुळे कुडाळ-मालवण तालुक्यातील आरोग्य सेवा अधिक सक्षम व प्रभावी बनेल, असा विश्वास त्यांनी व्यक्त केला आहे.
तारकर्ली (ता. मालवण) येथे नवीन आरोग्य उपकेंद्र उभारण्यात येणार आहे तर, कुडाळ तालुक्यातील वाडोस, गोठोस, जांभवडे आणि घोटगे या गावांमध्ये आरोग्य उपकेंद्रांच्या बांधकामास मंजुरी देण्यात आली आहे. या उपकेंद्रांमुळे स्थानिक नागरिकांना प्राथमिक उपचार, तसेच आपत्कालीन आरोग्य सुविधा जवळच्या परिसरातच उपलब्ध होणार आहेत. या नवीन आरोग्य उपकेंद्रांमुळे विशेषतः ग्रामीण भागातील रुग्णांना याचा मोठा फायदा होणार आहे. याबाबतची माहिती आमदार राणे यांच्या संपर्क कार्यालयातून देण्यात आली.