जिल्ह्यातील खाजगी रुग्णालयांत उद्यापासून तपासणी मोहीम

जिल्ह्यातील खाजगी रुग्णालयांत उद्यापासून तपासणी मोहीम
कुडाळ, ता. २४ ः जिल्ह्यातील सर्व खाजगी रुग्णालयांची धडक मोहिमेद्वारे तपासणी करण्यात येणार असून ही मोहीम शुक्रवार (ता.२६) पासून सुरू होणार आहे. महाराष्ट्र नर्सिंग होम कायद्याअंतर्गत असलेल्या सर्व तरतुदींचे खाजगी रुग्णालयांकडून पालन होते की नाही, याची खातरजमा करण्यासाठी ही तपासणी मोहीम राबविण्यात येत आहे. सिंधुदुर्ग जिल्ह्यात नागरी भागांमध्ये या कायद्यानुसार एकूण ५९ खाजगी रुग्णालयांची नोंदणी असून, नोंदणीकृत सर्व रुग्णालयांना कायद्यातील नियमांचे पालन करणे बंधनकारक आहे. यामध्ये प्रामुख्याने रुग्णालयाकडून आकारण्यात येणारे रुग्णशुल्क व इतर सेवा शुल्काचे दरपत्रक रुग्णालयाच्या दर्शनी भागात ठळकपणे लावणे, तसेच रुग्ण हक्क संहिता (रुग्णांना असलेले अधिकार) स्पष्ट व ठळक अक्षरांत दर्शनी भागात प्रदर्शित करणे आवश्यक आहे. यासोबतच प्रत्येक खाजगी रुग्णालयाचे वीज व अग्निशमन (फायर) ऑडिट पूर्ण झालेले असणे बंधनकारक करण्यात आले आहे. महाराष्ट्र नर्सिंग होम कायद्यातील सर्व तरतुदींचे पालन खाजगी रुग्णालयांकडून होत आहे की नाही, याची तपासणी करण्यासाठी २६ डिसेंबरपासून धडक मोहिमेद्वारे तपासणी करण्यात येणार आहे. या तपासणीत ज्या खाजगी रुग्णालयांमध्ये कायद्याचे उल्लंघन झाल्याचे निदर्शनास येईल, त्यांच्यावर संबंधित कायद्यानुसार योग्य ती कायदेशीर कारवाई प्रस्तावित करण्यात येणार असल्याची माहिती जिल्हा शल्यचिकित्सक, सिंधुदुर्ग यांनी दिली आहे.