कवठणीत संरक्षक भिंतीचे काम निकृष्ट

13616

कवठणीत संरक्षक भिंतीचे काम निकृष्ट

कवठणकरांचा आरोप; दुरुस्ती न केल्यास आंदोलनाचा इशारा

सकाळ वृत्तसेवा
सावंतवाडी, ता. २६ ः कवठणी (ता.सावंतवाडी) येथील रस्त्यावर उभारलेल्या संरक्षक भिंतीचे काम निकृष्ट दर्जाचे झाले असून, प्रशासनाच्या दुर्लक्षामुळे येथे अपघाताची शक्यता निर्माण झाली आहे. या कामाबाबत शिवसेना (ओबीसी व्हीजेएनटी) जिल्हाप्रमुख सुदन कवठणकर यांनी सार्वजनिक बांधकाम विभागाच्या कार्यकारी अभियंत्यांना निवेदन देऊन आंदोलनाचा इशारा दिला आहे.
​याबाबत कवठणकर यांनी उपअभियंता अजित पाटील यांना निवेदन दिले. त्यात म्हटले आहे की, ‘कवठणी रस्त्यावरील संरक्षक भिंतीसाठी २०२२-२३ च्या बजेटमध्ये सुमारे २.५ कोटींची मंजुरी होती. हे काम २०२४-२५ मध्ये पूर्ण केले. मात्र, संरक्षक भिंतीचे काम निकृष्ट दर्जाचे असून, संरक्षक भिंतीला पाईप टाकून मोरीचे बांधकाम केले आहे. रस्त्याच्या बाजूला टाकलेले बोल्डर्स अद्यापही तसेच पडून असल्याने अपघाताचा धोका वाढला आहे.​ याशिवाय सातार्डा ते कवठणी या मुख्य रस्त्याचे १ कि.मी. डांबरीकरण केले. मात्र, बाजूपट्टीचे काम अद्याप प्रलंबित आहे. आठ दिवसांत हे काम पूर्ण झाले नाही, तर तीव्र आंदोलन छेडले जाईल. होणाऱ्या अपघाताला प्रशासन जबाबदार राहील, असा इशारा कवठणकर यांनी दिला आहे.
..................
पुलाचीही अवस्था बिकट
​सातार्डा मुख्य रस्ता ते गोव्याला जोडणाऱ्या सातार्डा येथील पुलाच्या सुरुवातीलाच मोठा खड्डा पडला आहे. गेल्या वर्षी तक्रार केल्यानंतर तात्पुरती डागडुजी केली होती. मात्र, अद्याप कायमस्वरूपी तोडगा काढलेला नाही. या खड्ड्यामुळे एखादा मोठा अपघात होऊन जीवितहानी झाल्यास संबंधित अधिकाऱ्यांवर सदोष मनुष्यवधाचा गुन्हा दाखल करण्याची मागणी कवठणकर यांनी केली आहे. हा प्रश्नही आठ दिवसांत मार्गी लावण्याची मागणी त्यांनी निवेदनाद्वारे केली आहे.