चिपळूण-ठाकरे बंधू एकत्र आल्याचा चिपळूणमध्ये जल्लोष

ठाकरे बंधू एकत्र आल्याचा
चिपळूणमध्ये जल्लोष
चिपळूण, ता. २८ ः शिवसेना (उद्धव बाळासाहेब ठाकरे) आणि महाराष्ट्र नवनिर्माण सेना यांची युती झाल्यानंतर चिपळुणात आनंदाचे वातावरण निर्माण झाले आहे. चिपळूण शहरात शिवसेना उद्धव नेते आणि आमदार भास्कर जाधव यांच्या उपस्थितीत शिवसेना आणि महाराष्ट्र नवनिर्माण सेनेच्या पदाधिकाऱ्यांनी जल्लोष केला.
याप्रसंगी शिवसेना आमदार भास्कर जाधव म्हणाले, ठाकरे शिवसेना आणि मनसे युती व्हावी हे मी अगोदरपासून सांगत होतो. मुंबई महानगरपालिकेच्या निवडणुकीच्या निमित्ताने दोन्ही ठाकरे बंधू एकत्र आले. उद्धव ठाकरे आणि राज ठाकरे एकत्र आले याचा सर्वाधिक आनंद बाळासाहेब ठाकरे यांना झाला असेल. मलाही या गोष्टीचा तेवढाच आनंद आहे. रत्नागिरी जिल्ह्यात आणि कोकणामध्ये मनसेच्या कार्यकर्त्यांचा आदर राखला जाईल. त्यांना सन्मानाची वागणूक दिली जाईल.
भास्कर जाधव यांच्या संपर्क कार्यालयात जाधव येण्यापूर्वी दोन्ही पक्षाचे कार्यकर्ते एकत्र जमले आणि घोषणाबाजी सुरू केली. शिवसेना पक्षप्रमुख उद्धव ठाकरे तुम आगे बढो, महाराष्ट्र नवनिर्माण सेनेचे अध्यक्ष राज ठाकरे तुम आगे बढो अशा जोरदार घोषणा देण्यात आल्या. फटाक्यांची आतिषबाजी करून दोन्ही पक्षाच्या कार्यकर्त्यांनी एकमेकांना पेढे भरविले.