रत्नागिरी-स्वार्थासाठी समाजाचा वापर नको

rat2p3.jpg-
15057
रत्नागिरीः जाकादेवी येथील कुणबी समाजाच्या किसान भवनाच्या लोकार्पण सोहळ्यात बोलताना उद्योग मंत्री उदय सामंत.
----------------
समाजाचा वापर करणाऱ्यांना
खड्यासारखे बाजूला करा
मंत्री उदय सामंत ; जाकादेवीत कुणबी समाजाच्या भवनाचे लोकार्पण
सकाळ वृत्तसेवा
रत्नागिरी, ता. २ : मी कधीही जातीपातीचे राजकारण केले नाही तर सर्व समाज आपला आहे, या भावनेने समाजाला सोबत घेऊन जाण्यावर माझा विश्वास आहे; मात्र, जे लोक स्वतःच्या राजकीय स्वार्थासाठी समाजाचा वापर करतात त्यांना आता खड्यासारखे बाजूला करण्याची वेळ आली आहे, असा घणाघाती आरोप उद्योगमंत्री उदय सामंत यांनी केला.
तालुक्यातील जाकादेवी येथील कुणबी समाजाच्या किसान भवनाच्या लोकार्पण सोहळ्यात ते बोलत होते. सामंत म्हणाले, कुणबी सेनेला जो शब्द दिला होता तो आज मी पूर्ण केला आहे. माझ्या राजकीय कारकिर्दीची मुहूर्तमेढ हातणकर यांच्या मार्गदर्शनाखाली रोवली गेली. राष्ट्रवादी काँग्रेसमधील माझा प्रवेश आणि पुढील वाटचालीत त्यांनी मला मोलाचा सल्ला दिला होता. या समाजाने मला एकदा नाही तर पाचवेळा निवडून दिले आहे. समाजाच्या किसान भवनाच्या माध्यमातून मला काम करण्याची संधी मिळाली, हेच माझे मोठे भाग्य समजतो. इंजिनिअरिंग कॉलेजला शामराव पेजे यांचे नाव देणे असो वा पंचायत समितीमध्ये सभापती-उपसभापतीपदी संधी देणे असो, काही विरोध पत्करून मी हे धाडसी निर्णय घेतले आहेत. मला जिंकायची सवय झाली आहे आणि काहींना हरायची सवयच आहे.

चौकट
मंत्री सामंत यांनी स्वखर्चाने उभारले भवन
कुणबी भवनाच्या इमारतीची जुनी इमारत जीर्ण झाली होती. समाजमंडळाने अनेक ठिकाणी देणगीसाठी किंवा कंपन्यांना भेटून फंड उभारण्याचा प्रयत्न केला; परंतु त्याला अपयश आले. अखेर मंत्री सामंत यांच्याकडे याबाबतचा प्रस्ताव ठेवण्यात आला. त्यांनी थोडाही विलंब न लावता स्वखर्चातून नवीन वास्तूसाठी सव्वाकोटी रुपये दिले. त्यामुळे हा कुणबी समाज भविष्यात कायम तुमच्याबरोबर राहील, असा शब्द समाजाने सामंत यांना दिला.