गोडबोले पुरस्काराने तेजस राऊतचा गौरव

- rat१३p६.jpg-
P26O17395
तेजस राऊत

तेजस राऊतला गोडबोले पुरस्कार
चतुरंग प्रतिष्ठान; कोकणातील २४३ विद्यार्थ्यांमधून निवड
सकाळ वृत्तसेवा
सावर्डे, ता. १३ : चतुरंग प्रतिष्ठान, मुंबई यांच्यावतीने कोकणातील विद्यार्थ्यांना दिला जाणारा प्रतिष्ठेचा सर्वोत्तम विद्यार्थी गोडबोले पुरस्कार यंदा गोविंदराव निकम माध्यमिक व उच्च माध्यमिक विद्यालय, सावर्डे येथील विद्यार्थी तेजस राऊत याला प्रदान करण्यात आला.
रत्नागिरी व सिंधुदुर्ग जिल्ह्यांमधून गोडबोले पुरस्कारासाठी २४३ विद्यार्थ्यांच्या मुलाखती झाल्या होत्या. त्यामधून ३६ विविध विद्यालयांतील प्रत्येकी एक अशा एकूण ३६ विद्यार्थ्यांची निवड करण्यात आली. निवड झालेल्या सर्व विद्यार्थ्यांना निवृत्त मेजर जनरल शिशिर महाजन, कीर्तनकार व व्याख्याते डॉ. चारुदत्त आफळे, डॉ. प्रसाद देवधर, डॉ. मिलिंद गोखले तसेच प्राध्यापक वैभव कानिटकर यांच्या हस्ते प्रशस्तीपत्र, सन्मानचिन्ह, १ हजार रुपये रोख व ५०० रुपयांची पुस्तके देऊन गौरवण्यात आले. तबला, ढोलकीवादन तसेच चित्रकला या कला जोपासणाऱ्या तेजसने विज्ञानशाखेची निवड करून तंत्रज्ञानाशी संबंधित व्यवसाय करण्याचा निर्धार व्यक्त केला आहे. त्याने तबल्याच्या प्रवेशिका व मध्यमा प्रथम परीक्षा द्वितीय श्रेणीत उत्तीर्ण केल्या आहेत. त्याच्या या सर्व गुणवैशिष्ट्यांचा विचार करून परीक्षकांनी त्याची या पुरस्कारासाठी निवड केली. सर्वोत्तम विद्यार्थी गोडबोले पुरस्काराच्या रौप्य महोत्सवी वर्षापर्यंत गोविंदराव निकम माध्यमिक व उच्च माध्यमिक विद्यालयाने सलग २५ वर्ष हा मानाचा पुरस्कार प्राप्त केला असून, याबद्दल विद्यालयाचे विशेष अभिनंदन चतुरंग प्रतिष्ठानच्यावतीने करण्यात आले.
तेजसला शिक्षिका गौरी शितोळे यांचे मार्गदर्शन लाभले. संस्थेचे सचिव महेश महाडिक, शालेय समितीचे अध्यक्ष शांताराम खानविलकर, प्राचार्य राजेंद्र वारे, उपप्राचार्य विजय चव्हाण आदींनी त्याचे अभिनंदन केले.