कणकवली येथे ३१ रोजी दुसरे साहित्य संगीत संमेलन

19091
डॉ. निर्मोही फडके

कणकवली येथे ३१ रोजी
दुसरे साहित्य संगीत संमेलन

अध्यक्षपदी डॉ. निर्मोही फडके

कणकवली, ता. २० : साहित्य संगीत मित्र मंडळ सिंधुदुर्गतर्फे दुसरे साहित्य संगीत संमेलन शनिवारी (ता. ३१) दुपारी साडेतीनला शहरातील मराठा नाट्यगृहात आयोजित केले आहे. संमेलनाच्या अध्यक्षपदी साहित्य कला अभ्यासक डॉ. निर्मोही फडके यांची निवड केल्याची माहिती संमेलन स्वागताध्यक्ष महेंद्र चव्हाण आणि निमंत्रक सुभाष भंडारे यांनी दिली.
गतवर्षीपासून जिल्ह्यातील साहित्य, कला, संगीत या क्षेत्रातील मंडळी एकत्र येत साहित्य संगीत संमेलन भरवत आहेत. या संमेलनाची रूपरेषा पुढील काही दिवसांत जाहीर करण्यात येईल, अशी माहितीही श्री. चव्हाण आणि श्री. भंडारे यांनी दिली. तसेच संमेलनाच्या निमित्ताने देण्यात येणाऱ्या साहित्य, संगीत आणि चित्रकला या क्षेत्रातील व्यक्तींच्या पुरस्कारांची घोषणा केली जाईल, असेही त्यांनी सांगितले.
संमेलनाच्या यंदाच्या अध्यक्षा डॉ. निर्मोही फडके या ठाणे येथील लेखिका आणि मराठी भाषा-साहित्य क्षेत्रातील संशोधक आहेत. ‘डॉ. भालचंद्र नेमाडे यांच्या कादंबऱ्यांचा चिकित्सक अभ्यास’ या विषयात संशोधन करून पीएच. डी. पदवी प्राप्त केलेल्या डॉ. निर्मोही यांनी अडीच दशके शिक्षण क्षेत्रात काम केले आहे. बालशिक्षण आणि शालेय मराठी भाषा चळवळीत त्या सक्रिय आहेत. तसेच साहित्य क्षेत्रात लेखन, पुस्तकांचे संपादन, शब्दांकन, मुलाखती, अनुवाद इ. विविध प्रकारे त्या सातत्याने योगदान देत आहेत. आतापर्यंत त्यांचे दहा ग्रंथ प्रकाशित झाले असून, त्यांच्या पुस्तकांना अनेक महत्त्वाचे पुरस्कार प्राप्त झाले आहेत. या पार्श्वभूमीवर डॉ. निर्मोही यांची दुसऱ्या साहित्य संगीत संमेलनाच्या अध्यक्षपदी निवड केल्याचे यावेळी सांगण्यात आले.