आता पर्यटन व्यवसायाला मिळणार उद्योगाचा दर्जा

रत्नागिरी : पर्यटन आणि आदरातिथ्याला उद्योगाचा दर्जा देण्याचा निर्णय नुकत्याच झालेल्या मंत्रिमंडळाच्या बैठकीत घेतला आहे. त्यामुळे पर्यटन व्यवसायवृद्धी करणे शक्‍य होणार असून कोकणात बीच शॅकस्‌ योजना मार्च २०२१ पर्यंत प्रायोगिक तत्त्वावर निवडलेल्या ठिकाणी अमलात आणली जाईल, असा विश्‍वास पर्यटन राज्यमंत्री आदिती तटकरे यांनी व्यक्‍त केला.

रत्नागिरीतील शासकीय विश्रामगृहात आयोजित पत्रकार परिषदेत आदिती तटकरे म्हणाल्या की, मंत्रिमंडळाच्या बैठकीत पर्यटनाला उद्योगांचा दर्जाचा देण्यात आल्यामुळे अनेक व्यावसायिकांना आवश्‍यक त्या सोयी सुविधा उभारण्यासाठी वाव मिळणार आहे. व्यावसायिकांचीही तशी मागणी होती. ती सरकारने मान्य केली आहे. 

हेही वाचा - अपारंपरिक ऊर्जास्रोतांचा उपयोग करत तरुण खेळवतोय २४ तास वीज -

कोकणातील निवासी न्याहारी योजनेत अनेक सवलती दिल्या आहेत. यातून पर्यटनाकडे बघण्याचा दृष्टीकोन बदलेल. कोकण समृध्द करण्यासाठी पर्यटन कॅबिनेट मंत्री आदित्य ठाकरे यांच्या नेतृत्त्वाखाली सकारात्मक निर्णय घेतले आहेत. तसेच कोकणाला पर्यटनातून समृध्द बनविण्यासाठी शासनाने पाच जिल्ह्यातील आठ बिचवर गोव्याप्रमाणे शॅकस्‌ उभारण्याचा निर्णय घेतला आहे.

प्रत्येक जिल्ह्यात दोन बिच निवडले आहेत. त्याची अंमलबजावणी अंतिम टप्प्यात आहे. मार्च महिन्यात त्याची अंमलबजावणी होईल. जिल्ह्यातील पर्यटन विकासासाठी तयार केलेल्या ५०० कोटी आराखड्यातून पुढील वर्षभरात निधी देण्याचा आमचा प्रयत्न राहील.

ब्रासला ३,४०० रुपये दर

महागड्या वाळूचे दर कमी करण्यासाठी काही दिवसांपूर्वी महसूलमंत्र्यांबरोबर बैठक झाली. त्यामुळे ब्रासचे दर कमी कसे करता येतील, याचा प्रस्ताव ठेवला आहे. तो पुढील आठवड्यात मान्य होईल. नवीन प्रस्तावामध्ये ब्रासला ३,४०० रुपये दर देण्याचा विचार सुरु असल्याचे तटकरे यांनी सांगितले.

हेही वाचा -  एसटी कंडक्टरच्या मृत्यूचे गूढ कायम ; मृतदेह गळफास लावलेल्या अवस्थेत पाहून सर्वच चक्रावले -

संपादन - स्नेहल कदम