Konkan Politics : शरद पवारांच्या आशीर्वादाने 'या' जागा आम्ही निश्चित जिंकू; आमदार भास्कर जाधवांना विश्वास

चिपळूण : महाविकास आघाडीची (Mahavikas Aghadi) वज्रमूठ आता मजबूत आहे. त्या जोरावर आपण चिपळूणसह जिल्ह्यातील पाचही जागा जिंकू, असा विश्वास आमदार भास्कर जाधव (Bhaskar Jadhav) यांनी व्यक्त केला. वाढती महागाई, बेरोजगारी व मोदी सरकारवर त्यांनी कडाडून हल्ला चढवला.

खेर्डी येथे संस्कृती मंगल हॉलमध्ये शुक्रवारी सायंकाळी खेर्डी पंचायत समिती गणाचा शिवसेना कार्यकर्त्यांचा मेळावा झाला. त्या वेळी ते बोलत होते. जाधव म्हणाले, सध्या सोशल मीडिया, वृत्तपत्रातील बातम्यांवर जाऊ नका, तर वस्तुस्थिती पाहा. पक्षप्रमुख उद्धव ठाकरे यांच्यावर लोकांचा विश्वास वाढत आहे. जनमानसात शिवसेनेला पाठिंबा वाढत असल्याने महाविकास आघाडी मजबूत होत आहे.

राष्ट्रवादीचे शरद पवारांचे आशीर्वाद आणि तुमची सर्वांची समर्थ साथ, या बळावर आपण चिपळूण-संगमेश्वरची ही जागा निश्चित जिंकू. राष्ट्रवादीसह काँग्रेसचे तालुकाध्यक्ष प्रशांत यादव हेही आपल्याबरोबर आहेत, असे त्यांनी सांगितले. या वेळी शिवसेना उबाठा तालुकाप्रमुख विनोद झगडे, युवासेना राज्य कार्यकारिणी सदस्य, विक्रांत जाधव, ऐश्वर्या घोसाळकर, तालुका समन्वयक स्वाती देवळेकर, तालुका संघटक मानसी भोसले आदी उपस्थित होते.

आता संपूर्ण रत्नागिरी जिल्हा आपण ताब्यात घेण्याचे ठरवले आहे. मी होऊ द्या चर्चा या कार्यक्रमासाठी कोल्हापूर, पुणे येथे जाऊन आलो. आता रत्नागिरीकडे लक्ष देण्याचे ठरवले आहे. मी कुठूनही लढावे, अशी प्रत्येकाची इच्छा आहे; पण आपण आता जोमाने काम करून खेडमध्ये संजय कदम, गुहागरचे मी बघेन. आमदार राजन साळवी, रत्नागिरीत उमेदवार ठरेल तो व चिपळूणची जागाही आपण जिंकू, असेही त्यांनी स्पष्ट केले.

'संधी मिळाली तर चिपळूणमधून लढू'

जिल्ह्यातील पाचही जागा उद्धव बाळासाहेब ठाकरे पक्षाच्या निवडून येतील, असा आशावाद आमदार भास्कर जाधव यांनी व्यक्त केला. त्याचबरोबर आपण संधी मिळाली तर चिपळूणमधून लढणार असल्याचे स्पष्ट संकेतही त्यांनी दिले.