युवाशक्ती एकवटली, कृती समितीलाही पाठिंबा, काय आहे कारण? वाचा...

सावंतवाडी (सिंधुदुर्ग) - जिल्ह्यात तत्काळ शासकीय वैद्यकीय महाविद्यालय व रुग्णालय सुरू व्हावे, यासाठी आता युवाशक्ती पुढे आली आहे. त्यांनी शासकीय वैद्यकीय महाविद्यालय कृती समितीला पाठिंबा दिला असून जिल्ह्यातील सर्व पंचायत समिती सभापती, कुडाळ व वेंगुर्ले नगराध्यक्ष, सरपंच, गटविकास अधिकारी यांना हे महाविद्यालय व रुग्णालय तत्काळ व्हावे, यासाठी लेखी निवेदने देऊन पाठपुरावा करण्याची मागणी केली आहे. 

वाचा - सिंधुदुर्गात गणेशोत्सव  साजरा करण्याच्या मार्गदर्शक सूचना जाहीर : के मंजुलक्ष्मी  

जिल्ह्यात शासकीय वैद्यकीय महाविद्यालय व रुग्णालय व्हावे यासाठी तालुक्‍यातील पंचायत समिती सभापती मानसी धुरी यांना सावंतवाडी येथे सौरभ आईर, मुन्ना आजगाकर, सच्चिदानंद ठाकूर, रोशन राऊळ, विनय वाडकर, शुभम घावरे यांनी लेखी निवेदन सादर केले. तर दोडामार्ग येथे अभिमन्यू गवस, राजेश कोरगावकर, मिलिंद नाईक, गोविंद टेंबकर, प्रभाकर मयेकर, हर्षद तंबुळकर, बाळकृष्ण कोरगावकर, विशाल चव्हाण, समीर शिरोडकर व नवकिरण युवा मंच सुरुची वाडी दोडामार्गच्या सदस्यांनी दोडामार्ग पंचायत समितीसह सरपंच गटविकास अधिकाऱ्यांना निवेदने दिली.

कणकवली येथे लक्ष्मण गावडे, नितीन तावडे, दिग्विजय राणे, प्रथमेश वरवडेकर, संदेश सावंत यांनी निवेदन दिले. मालवण येथे सायली आचरेकर, स्वाती पारकर, निधी मुणगेकर. देवगड येथे सावित्रीबाई फुले प्रतिष्ठान सिंधुदुर्ग सचिव पुर्वा सावंत, आरती धुरी, स्वप्नाली वाल्मिकी यांनी तर कुडाळ येथे जय पडते, आशिष राऊळ, विवेक बोभाटे, शंकर पंदारे, ज्ञानेश सरनोबत, महादेव शिरोडकर, दैवेश रेडकर, मोहन मांजरेकर, रमाकांत नाईक यांनी दिले. वेंगुर्ले येथे यशवंतगड शिवप्रेमी ग्रुपचे रुपाली परब, वैशाली वडर, अभिषेक रेगे, भुषण मांजरेकर, सरोज परब, सुकन्या परब, सौरभ नागोळकर, संपदा राणे सिंहगर्जना ग्रुप वेंगुर्ले साईप्रसाद भोई, राहुल मरुडेकर, सौरभ धुरी, अमित नाईक, प्रणव वायगणकर, रोहन नाईक, सुरज मालवणकर, चिन्मय डूबळे वेताळ प्रतिष्ठान ग्रुप, तुळसचे सचिन परुळकर, महेश राऊळ, विवेक तिरोडकर, प्रशांत सावंत, किरण राऊळ, निखिल ढोले, सोनाली आंगचेकर, वैभव होडावडेकर, प्रसाद परुळकर यांनी निवेदने दिली. 

हेही वाचा - शिक्षकांच्या बदल्या, काहींचा आक्षेप! वाचा सिंधुदुर्गातील स्थिती... 

मुख्यमंत्र्यांकडे मागणी 
निवेदने शासकीय वैद्यकीय महाविद्यालय, कृती समिती जिल्हा सिंधुदुर्गकडून मुख्यमंत्र्यांसह इतर लोकप्रतिनिधींना दिली आहेत. जन जागरण करून 25000 नागरिकांनी पोस्ट कार्ड व 130 ठराव जिल्ह्यातील स्थानिक स्वराज्य संस्था ग्रामपंचायत, पंचायत समिती, नगरपालिका, नगरपंचायत यांनी पारीत केलेले ठराव सिंधुदुर्ग जिल्हाधिकाऱ्यांमार्फत तत्कालिन मुख्यमंत्र्यांना पाठवण्यात आले. 15 ऑगस्ट 2019 साली लाक्षणिक उपोषणही प्रांताधिकारी कार्यालय येथे केले. जिल्ह्यातील नागरिकांनी मेलवरून आपली मागणी मुख्यमंत्री उद्धव ठाकरे यांच्यापर्यंतही पोचवली आहे. 

मुख्यमंत्रीही सकारात्मक 
मुख्यमंत्रीही सकारात्मक असून त्यांनी 19 जूनला कोविड टेस्ट लॅब लोकार्पणवेळी शासकीय वैद्यकीय महाविद्यालय व रुग्णालयची मागणी पूर्ण करू असे सांगितले. याचा पुनरुच्चार 3 जुलैला झालेल्या व्हिडीओ कॉन्फरन्सवेळी केला व त्याचवेळी पालकमंत्री उदय सामंत यांनी सांगितले होते, की महिन्याभरात सिंधुदुर्ग शासकीय वैद्यकीय महाविद्यालयाचा प्रस्ताव मंत्रिमंडळसमोर येईल. मंत्रिमंडळ मंजुरी मिळण्याची प्रतीक्षा असून मुख्यमंत्री व सरकार सकारात्मक असताना जिल्ह्यातील स्थानिक लोकप्रतिनिधींनी ही मागणी लावून धरण्यासाठी निवेदन दिल्याचे सांगण्यात आले. 

संपादन - राहुल पाटील