Alyssa Healy : ऑस्ट्रेलियाच्या महिला संघानं सामना गमावला मात्र कर्णधारानं जिंकलं मन; एलिसा हेली होतेय ट्रेंड

Alyssa Healy Trending After India Women Defeat Australia Women : भारतीय महिला क्रिकेट संघाने आज इतिहास रचला. वानखेडे स्टेडियमवर ऑस्ट्रेलियाविरूद्ध झालेल्या एकमेव कसोटी सामन्यात भारताने 8 विकेट्स राखून विजय मिळवला. भारताचा हा महिला कसोटी क्रिकेटच्या इतिहासातील ऑस्ट्रेलियाविरूद्धचा पहिला विजय आहे. त्यामुळे हा विजय हरमन आणि टीमसाठी खूप खास आहे.

या विजयाचा जल्लोष करत असताना ऑस्ट्रेलियाची कर्णधार एलिका हेली हिने केलेल्या एका कृतीमुळे ती ट्रेंड करत आहे. भारताच्या विजयासोबतच ऑस्ट्रेलियाची कर्णधार एलिसाचेही कौतुक होत आहे.

सामना झाल्यानंतर हरमनने मुलाखत दिली. त्यानंतर मालिका जिंकलेली ट्रॉफी हातात घेऊन हरमनप्रीत कौर संघासोबत जल्लोष करत होती. त्यावेळी ऑस्ट्रेलियाची कर्णधार एलिसा हेली हातात कॅमेरा घेऊन विजयी जल्लोष करणाऱ्या संघाचा फोटो काढत होती. एलिसा हेलीचा हा व्हिडिओ सध्या सोशल मीडियावर तुफान व्हायरल झाला आहे.

1977 पासून आतापर्यंत झालेल्या भारत - ऑस्ट्रेलिया महिला संघातील कसोटी सामन्यात ऑस्ट्रेलिया कधीही पराभूत झाली नव्हती. मात्र एलिसा हेलीच्या नेतृत्वातील संघाला भारताने मात दिली.

एलिसा हेली भारतीय महिला संघाकडून कसोटीत पराभूत होणारी पहिली कर्णधार ठरली आहे. असं असतानाही हेलीने मनाचा मोठेपणा दाखवत विजयी भारतीय संघाचा फोटो काढला. त्यामुळे तिच्याबद्दल ऑस्ट्रेलियाच नाही तर भारतीय संघातील खेळाडूंमध्ये देखील आदराची भावना निर्माण झाली असेल.

एलिसा हेलीने संपूर्ण क्रिकेट जगताला एक मोठा संदेश दिला आहे. खिलाडूवृत्ती काय असते हे तिने बोलून नाही तर कृतीतून दाखवून दिलं. विजयी झाल्यावर सर्वजण खिलाडूवृत्ती दाखवतातच मात्र पराभूत होऊनही अशी कृती करणं नक्कीच कौतुकास्पद आहे.

(Sports Latest News)