Amitabh Choudhary : झारखंड क्रिकेट असोसिएशनचे माजी अध्यक्ष अमिताभ चौधरी यांचे निधन

Amitabh Choudhary : झारखंड स्टेट क्रिकेट असोसिएशनचे (JSCA) माजी अध्यक्ष आणि झारखंड लोकसेवा आयोगाचे माजी अध्यक्ष अमिताभ चौधरी यांचे मंगळवारी सकाळी निधन झाले. भारतीय क्रिकेट नियामक मंडळात त्यांनी महत्त्वाची भूमिका बजावली आहे. बीसीसीआयमध्ये अमिताभ चौधरी कार्यकारी सचिवपद भूषवले आहे. एएनआय वृत्तसंस्थेने दिलेल्या माहितीनुसार, अमिताभ यांचे हृदयविकाराच्या झटक्याने निधन झाले आहे. रांची येथील संतेविता रुग्णालयात 62 व्या वर्षी त्यांनी अखेरचा श्वास घेतला.

झारखंडचे मुख्यमंत्री हेमंत सोरेन यांनी त्यांच्या निधनावर शोक व्यक्त केला आहे. अमिताभ चौधरी यांचा जन्म 6 जुलै 1960 रोजी झाला. दोन वर्षांपूर्वी त्यांची जेपीएससीच्या अध्यक्षपदी निवड झाली होती. या वर्षी 5 जुलै रोजी ते या पदावरून निवृत्त झाले. अमिताभ चौधरी हे झारखंडमधील प्रसिद्ध लोकांपैकी एक होते ज्यांनी शासन, प्रशासन, क्रिकेट आणि राजकारणात वेगळी ओळख निर्माण केली.

बीसीसीआयचे 2002 मध्ये अमिताभ चौधरी सदस्य झाले. 2005 मध्ये झारखंडचे तत्कालीन उपमुख्यमंत्री सुदेश कुमार महतो यांचा पराभव करून ते झारखंड स्टेट क्रिकेट असोसिएशन (JSCA) चे अध्यक्ष बनले. 2005 ते 2009 या काळात क्रिकेट टीम इंडियाचे व्यवस्थापकही होते. 2014 मध्ये अमिताभ यांनी राजकारणात पाऊल ठेवले. भाजपकडून तिकीट न मिळाल्याने अमिताभ यांनी बाबुलाल मरांडी यांच्या पक्ष जेव्हीएमकडून रांची लोकसभा निवडणूकही लढवली होती. मात्र त्यांना निवडणूक जिंकता आली नाही.