Ashes Trophy : ऑस्ट्रेलियन संघाकडून धावांचा पाठलाग सुरु; अखेरच्या दिवशी २४९ धावांची गरज

ओव्हल - ॲशेस हा प्रतिष्ठेचा करंडक आपल्याकडे ठेवल्यानंतर ऑस्ट्रेलियन क्रिकेट संघाने येथे सुरू असलेल्या अखेरच्या कसोटीत चौथ्या डावात दमदार सुरुवात केली आहे. इंग्लंडकडून ३८४ धावांचे आव्हान ठेवण्यात आल्यानंतर ऑस्ट्रेलियाने चौथ्या दिवशी पावसाचा व्यत्यय येईपर्यंत बिनबाद १३५ धावा फटकावल्या होत्या. त्यानंतर खेळ होऊ शकला नाही.

ऑस्ट्रेलियाला विजयासाठी आणखी २४९ धावांची गरज असून या कसोटीचा अखेरचा अर्थातच पाचवा दिवस बाकी आहे. ऑस्ट्रेलियन संघाकडे या मालिकेत २-१ अशी आघाडी आहे.

इंग्लंडने ९ बाद ३८९ या धावसंख्येवरून रविवारी पुढे खेळायला सुरुवात केली; पण त्यांना फक्त सहा धावांचीच भर घालता आली. टॉड मर्फीच्या गोलंदाजीवर जेम्स अँडरसन आठ धावांवर बाद झाला. इंग्लंडला दुसऱ्या डावात ३९५ धावांपर्यंत मजल मारता आली. त्यामुळे ऑस्ट्रेलियासमोर विजयासाठी ३८४ धावांचे आव्हान उभे ठाकले.

वेगवान गोलंदाज मिचेल स्टार्कने १०० धावा देत चार फलंदाज बाद केले. टॉड मर्फी याने ११० धावा देत चार फलंदाज बाद केले.

संक्षिप्त धावफलक -

इंग्लंड - पहिला डाव २८३ धावा आणि दुसरा डाव ३९५ धावा, वि.

ऑस्ट्रेलिया - पहिला डाव २९५ धावा आणि बिनबाद १३५ धावा.

शानदार सलामी

धावांचा पाठलाग करताना ऑस्ट्रेलियन संघातील सलामीवीरांनी शानदार सुरुवात केली. डेव्हिड वॉर्नर व उस्मान ख्वाजा या जोडीने इंग्लंडच्या गोलंदाजांचे आव्हान लीलया परतवून लावले. वॉर्नरने ९ चौकारांसह नाबाद ५८ धावांची आणि ख्वाजाने ८ चौकारांसह नाबाद ६९ धावांची खेळी साकारली. ऑस्ट्रेलियाने बिनबाद १३५ धावा केल्यानंतर पावसाचा व्यत्यय आला.

ब्रॉडचा अलविदा

इंग्लंडचा उंचपुरा वेगवान गोलंदाज स्टुअर्ट ब्रॉड याने या कसोटीनंतर क्रिकेटमधून निवृत्त होण्याचा निर्णय घेतला आहे. स्टुअर्ट ब्रॉड व जेम्स अँडरसन हे इंग्लंडचे तळाचे फलंदाज रविवारी खेळपट्टीवर आले, तेव्हा ऑस्ट्रेलियन खेळाडूंनी ब्रॉडला मानवंदना दिली. ब्रॉड याने इंग्लंडसाठी १६७ कसोटी सामने खेळताना ६०२ फलंदाज बाद केले आहेत. शिवाय त्याने १२१ एकदिवसीय व ५६ टी-२० सामन्यांमध्येही इंग्लंडचे प्रतिनिधीत्व केले आहे.