World Cup 2023 : वर्ल्ड कपच्या सेमीफायनलमध्ये संघ निवडण्याची 'डोकेदुखी' ताकद दर्शवणारी

Australia World Cup Semi final Pat Cummins :

विश्वकरंडक क्रिकेट स्पर्धेत दक्षिण आफ्रिकेविरुद्ध होणाऱ्या उपांत्या सामन्यासाठी कोणाला अंतिम संघात स्थान द्यायचे, ही डोकेदुखी आमची ताकद दाखवणारी असेल, असे ऑस्ट्रेलियाचा कर्णधार पॅट कमिंसने सांगितले. बांगलादेशविरुद्धच्या सामन्यात मिचेल मार्शने नाबाद १७७ धावांची खेळी करून त्याने कमिंस आणि संघ व्यवस्थापनाची 'डोकेदुखी' वाढवली आहे.

सलग दोन पराभवाने सुरू झालेली ऑस्ट्रेलियाची मोहीम साखळी सामन्यांत सात विजयाने पूर्ण झाली. त्यांचा उपांत्य फेरीत सामना दक्षिण आफ्रिकेविरुद्ध कोलकतामध्ये होणार आहे.

ग्लेन मॅक्सवेलने मुंबई अफगाणिस्तानविरुद्ध अविस्मरणीय नाबाद २०१ धावांची खेळी साकार केली. त्यानंतर शनिवारी मार्शने १३२ चेंडूत नाबाद १७७ धावा झळकावल्या. त्यामुळे ऑस्ट्रेलियाकडे आता मधल्या फळीसाठी अनेक पर्याय निर्माण झाले आहेत. संघातील सर्व १५ खेळाडूंना या स्पर्धेत खेळण्याची संधी मिळाली आहे. त्यामुळे ईडन गार्डनवरील परिस्थितीचा अंदाज घेऊन आम्ही संघ निवड करू असे कमिंसने सांगितले.

सलग सात सामने जिंकणे, हे आमच्यासाठी खासच होते; तसेच तीनशे धावांपर्यंतच्या धावसंख्येचा यशस्वी पाठलाग करणे हेसुद्धा तेवढेच महत्त्वाचे होते, असे कमिंस म्हणाला.

गोलंदाजीत माझ्याकडून भरपूर धावा देण्यात आल्या होत्या, तरीही मला सामन्यातील सर्वोत्तम खेळाडू म्हणून गौरवण्यात आले याचे आश्चर्य वाटत आहे. चार षटकांत जवळपास ५० धावा मी दिल्या होत्या होत्या; परंतु याची भरपाई मी फलंदाजीत केली, याचा आनंद आहे, असे मार्शने सांगितले, गेल्या आठवड्यात माझ्या आजोबांचे निधन झाले. त्यासाठी मायदेशी गेलो होतो. आता माझी आक्रमक शतकी खेळी पाहून आई आणि वडिलांना निश्चितच आनंद झाला असेल, असेही मार्श म्हणाला.