पर्थ : भारतीय पुरुष हॉकी संघावर व्हाईटवॉशची नामुष्की ओढवली. यजमान ऑस्ट्रेलियन हॉकी संघाने येथे झालेल्या अखेरच्या लढतीत भारतीय संघावर ३-२ असा विजय नोंदवला. ऑस्ट्रेलियाने या मालिकेत ५-० असे घवघवीत यश संपादन केले.
भारताने पाचव्या लढतीत चौथ्या मिनिटालाच आघाडी घेतली. हरमनप्रीत सिंगने पेनल्टी कॉर्नरवर गोल केला. त्याचा हा या मालिकेतील तिसरा गोल ठरला. ऑस्ट्रेलियाने दुसऱ्या क्वॉर्टरमध्ये बरोबरी साधली. जेरेमी हायवर्ड याने २० व्या मिनिटाला पेनल्टी कॉर्नरवर गोल केला. तिसऱ्या क्वॉर्टरमध्ये ऑस्ट्रेलियाने दोन गोल करताना भारतावरील दबाव वाढवला. के. वाय. विलियट याने ३८ व्या मिनिटाला व टीम ब्रँडने ३९ व्या मिनिटाला गोल करीत ऑस्ट्रेलियाला ३-१ अशी आघाडी मिळवून दिली. भारतासाठी दुसरा गोल बॉबी सिंग धामी याने केला. त्याने ५३ व्या मिनिटाला गोल केला, पण त्यानंतर भारतीय संघाला गोल करता आला नाही
पाच लढतींमधील कामगिरी
भारत-ऑस्ट्रेलिया यांच्यामधील पाच सामन्यांची मालिका एकतर्फी झाली. ऑस्ट्रेलियाने पहिला सामना ५-१ असा मोठ्या फरकाने जिंकला. दुसऱ्या सामन्यातही त्यांनी ४-२ असे भारताचे आव्हान परतवून लावले. भारतीय संघाकडून तिसऱ्या लढतीत कडवी झुंज देण्यात आली. तरीही ऑस्ट्रेलियाने २-१ असा विजय मिळवला. कांगारुंनी चौथ्या लढतीत ३-१ असे यश संपादन केले. अखेरची लढत ३-२ अशी जिंकताना ऑस्ट्रेलियाने वर्चस्व प्रस्थापित केले.
जेरेमीचे सर्वाधिक गोल
ऑस्ट्रेलियाच्या जेरेमी हायवर्ड याने पाच सामन्यांच्या मालिकेत सर्वाधिक गोल केले. त्याने पाच सामने खेळताना सात गोल केले. यापैकी सहा गोल त्याने पेनल्टी कॉर्नरवर, तर एक गोल पेनल्टी स्ट्रोकवर केला. भारताच्या हरमनप्रीत सिंगने तीन गोल केले. ऑस्ट्रेलियाच्या टॉम विकहॅम, व टीम ब्रँड यांनी प्रत्येकी दोन गोल केले. तसेच भारताच्या जुगराज सिंग यानेही दोन गोल केले.
पॅरिस ऑलिंपिकची तयारी
पॅरिस ऑलिंपिकच्या तयारीकडे लक्ष ठेवून भारत-ऑस्ट्रेलिया यांच्यामधील मालिकेचे आयोजन करण्यात आले होते. ऑस्ट्रेलियाने पाचही सामन्यांत विजय मिळवून आपण सज्ज झालो आहोत याची झलक दाखवली, पण भारतीय संघाला प्रत्येक बाबींमध्ये सुधारणा करण्याची गरज आहे. आगामी काळात भारतीय संघाला प्रचंड मेहनत घ्यावी लागणार आहे.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.