हृदयविकाराच्या झटक्यानं ऑस्ट्रेलियाचा दिग्गज क्रिकेटपटू कोमात

नवी दिल्ली : ऑस्ट्रेलियाचे दिग्गज क्रिकेटपटू रॉड मार्श (Australian Cricketers Rod Marsh) यांना हृदयविकाराचा झटका (Heart Attack) आला असून ते कोमात गेले आहेत. एका धर्मादाय कार्यक्रमात सहभागी होण्यासाठी रॉड मार्श बुंडाबर्ग येथे गेले होते, त्यावेळी त्यांना हृदयविकाराचा झटका आला. त्यानंतर बुल्स मास्टर्सचे आयोजक जॉन ग्लॅनविल आणि डेव्हिड हिलियर यांनी त्यांना तातडीनं रुग्णालयात दाखल केलं.

बुल्स मास्टर्सचे जिमी माहेर म्हणाले, 'डेव्हिड हिलियर आणि मी मार्श यांना वेळेत उपचाराकरिता नेलं नसतं, तर त्यांचा जीव वाचवणं कठीण होतं.' 74 वर्षीय रॉड मार्श यांनी 1970 ते 1984 दरम्यान ऑस्ट्रेलियाकडून 96 कसोटी सामने खेळले. यादरम्यान त्यांनी 26.51 च्या सरासरीनं 3 हजार 633 धावा केल्या. त्यांच्या नावावर 3 शतकं आणि 16 अर्धशतकं आहेत.

रॉड मार्श ऑस्ट्रेलियाचे निवडकर्तेही आहेत

मार्श यांनी 92 एकदिवसीय सामन्यांमध्ये आपल्या देशाचं प्रतिनिधित्व केलंय. त्यामध्ये त्यांनी 1225 धावा केल्या. त्यांच्या नावावर 4 अर्धशतकं आहेत. रॉड मार्श 2016 पर्यंत ऑस्ट्रेलियाच्या पुरुष संघाचे निवडकर्तेही होते. ऑस्ट्रेलियन क्रिकेट असोसिएशनने मार्श यांच्या कुटुंबाच्या वतीनं एक निवेदन जारी केलंय. त्यात त्यांनी रॉड मार्श जीवनाशी झुंज देत असल्याचं म्हंटलंय.