टीम इंडिया इंग्लंडला रवाना पण, नेटकरी म्हणतात 'गेला रोहित कुणीकडे'?

मुंबई : भारताचा कसोटी संघ इंग्लंडमध्ये एकमेव कसोटी सामना खेळण्यासाठी गुरूवारी पहाटे मुंबईवरून इंग्लंडला रवाना झाला. यावेळी बीसीसीआयने आपल्या ट्विटर अकाऊंटवरून टीम इंडियाचे काही फोटो शेअर केले. याला 'इंग्लंड बाऊंड टीम इंडियाचा फोटो, संघ इंग्लंडसाठी रवाना' असे कॅप्शनही दिले. बीसीसीआयने शेअर केलेल्या या फोटोत विराट कोहली, मोहम्मद सिराज, चेतेश्वर पुजारा आणि जसप्रीत बुमराह दिसत आहेत. याचबरोबर दुखापतीतून सावरलेला रविंद्र जडेजा देखील होता. (BCCI Share Photo during Team India Take Off To England Fans Asked Where Is Captain Rohit Sharma)

पुजाराने शेअर केलेल्या फोटोत देखील विराट कोहली, रविंद्र जडेजा, शार्दुल ठाकूर, शुभमन गिल, प्रसिद्ध कृष्णा आणि केएस भरत यांचा समावेश होता. पुजाराने या फोटोला 'पुढच्या आव्हानासाठी सज्ज, युके बाऊंड' असे कॅप्शन दिले. मात्र बीसीसीआयने शेअर केलेल्या या सगळ्या फोटोंमध्ये भारताचा कर्णधार रोहित शर्मा कुठेच दिसत नाही. त्यामुळे नेटकऱ्यांनी कर्णधार रोहित कुठे आहे असे प्रश्न विचारण्यास सुरूवात केली.

दरम्यान, संघाचा उपकर्णधार केएल राहुल देखील या फोटोमध्ये दिसत नाही. बीसीसीआयने दिलेल्या माहितीनुसार केएल राहुल अजून दुखापतीतून सावरलेला नाही. त्यामुळे तो इंग्लंड दौऱ्यावरील कसोटी तसेच मर्यादित षटकांची मालिका देखील मुकण्याची दाट शक्यता आहे. भारत गेल्या इंग्लंड दौऱ्यावर पाच कसोटी सामन्यांच्या मालिकेत 2-1 असा आघाडीवर होता. मात्र भारतीय संघातील खेळाडूंना कोरोनाची लागण होऊ लागल्यामुळे पाचवा कसोटी सामना पुढे ढकलण्यात आला होता. तो आता यावर्षी जुलै महिन्यात खेळवण्यात येणार आहे.