Irani Cup: मुंबईच्या ५३७ धावा; शेष भारताचा अभिमन्यू ईश्वरन खंबीरपणे उभा राहिला, द्विशतकाच्या जवळ पोहोचला

Abhimanyu Easwaran close to double century: इराणी कप सामन्यात मुंबईने केलेल्या ५३७ धावांच्या प्रत्युत्तरात शेष भारताकडून अभिमन्यू ईश्वरनने १५१ धावांची दमदार खेळी केलीआहे. मुंबईच्या गोलंदाजीपुढे शेष भारताचे आघाडीचे फलंदाज लवकर परतले. यात अभिमन्यू ईश्वरन तग धरून राहिला आणि आता द्विशतकाच्या जवळ पोहचला आहे. सर्फराजने केलेल्या द्विशतकाचा बदला अभिमन्यू द्विशतकानेच घेतो का ? हे पाहणे महत्वाचे ठरले आहे.

३७ धावांवर ३ विकेट अशी मुंबईची बिकट परिस्थिती असताना कर्णधार अजिंक्य रहाणेने मुंबईचा डाव सावरला. त्याला श्रेयश अय्यरची साथ मिळाली. दोघांनी १७० चेंडूत १०२ धावांची भागिदारी केली. श्रेयश अय्यर ५७ धावांवरती परतला. पण पुढे फलंदाजीसाठी आलेल्या सर्फराजने खानसोबत रहाणेने १३० धावांची मोठी भागिदारी केली.

रहाणेचे शतक अवघ्या ३ धावांनी हूकले. रहाणेने या खेळीदरम्यान ७ चौकार व १ षटकारासह एकूण ९७ धावा जोडल्या. कर्णधार परतल्यावर सर्फराजने तनुष कोटियनला साथीला घेतले आणि मुंबईची फलंदाजी त्याच आक्रमकतेने सुरू ठेवली.

तनुष कोटियननेही १२८ चेंडूत ६४ धावांची अर्धशतकीय खेळी केली. तर सर्फराज खानने २८६ चेंडूत २२२ धावांची द्विशतकी खेळी करत मुंबईकडून खेळताना नवा विक्रम रचला. सर्फराजने या खेळीदरम्यान तब्बल २५ चौकार व ४ षटकार ठोकले. सर्फराजच्या या मोठ्या खेळीमुळे मुंबईने तिसऱ्या दिवसाच्या सुरुवातीपर्यंत मुंबईने ५३७ धावा धावफळकावर लावल्या.

प्रत्युत्तरासाठी उतरलेल्या कर्णधार ऋतुराजला मुंबईच्या जुनैद खानने अवघ्या ९ धावांवर माघारी पाठवले. तर दुसरीकडे अभिमन्यू ईश्वरन आक्रमक फलंदाजी करत होता. शेष भारत संघाचे फलंदाज स्वस्तात परतत असताना अभिमन्यूने आपली खेळी लावून धरली. शेष भारत संघाने पहिल्याच दिवशी ४ विकेट्स गमावले असताना त्याने संघाचा भार एकहाती सांभाळला.

अभिमन्यूने १५० धावांवर नाबाद आहे. या खेळीदरम्यान त्याने १२ चौकार व १ षटकारासह २१२ चेंडूत १५१ धावा केल्या आहेत. अभिमन्यूच्या साथीला ध्रुव जुरेल ३० धावांवर खेळत असून त्यांनी तिसऱ्या दिवसाअंतीपर्यंत ६५ धावांची भागीदारी केली आहे.