Rahul Dravid BCCI Incentive : हा प्रोत्साहन भत्ता नाही तर... राहुल द्रविडची बीसीसीआयच्या स्किमवर पहिली प्रतिक्रिया

Rahul Dravid Statement On BCCI Test Cricket Incentive Scheme : भारतीय संघातील श्रेयस अय्यर आणि इशान किशन सारख्या स्टार खेळाडूंनी देशांतर्गत क्रिकेट खेळण्यास नकार दिला होता. त्यांना याची किंमत मोजावी लागली. बीसीसीआयने त्यांना केंद्रीय करारातून बाहेरचा रस्ता दाखवला.

याचबरोबर बीसीसीआयने आता कसोटी क्रिकेट खेळण्यासाठी खेळाडूंना प्रोत्साहन मिळावे म्हणून एक नवीन स्कीम सुरू केली आहे. भारताने इंग्लंडविरूद्धची पाच कसोटी सामन्यांची मालिका 4-1 अशी जिंकल्यानंतर बीबीसीआय सचिव जय शहा यांनी ही स्कीम जाहीर केली.

या स्कीमबाबत प्रशिक्षक राहुल द्रविड यांनी देखील आपली प्रतिक्रिया दिली असून त्यांनी बीसीसीआयच्या कसोटी क्रिकेटला महत्व देण्याच्या या स्कीमचे कौतुक केले आहे.

बीसीसीआय सचिव जय शहा यांनी आज जे खेळाडू भारताकडून कसोटी क्रिकेट खेळतील त्यांना हंगामात खेळलेल्या कसोटी सामन्यांच्या अनुषंगाने पगार आणि मॅच फी व्यतिरिक्त प्रोत्साहन भत्ता देण्यात येणार असल्याची घोषणा केली.

यावर प्रशिक्षक राहुल द्रविडने देखील आपले मत व्यक्त केले. इंग्लंडविरूद्धच्या कसोटी मालिका विजयानंतर राहुल द्रविड म्हणाला, 'मला आशा आहे की कसोटी क्रिकेट खेळण्यासाठी पैसा हा प्रोत्साहन म्हणून देण्यात येत नाहीये. कसोट क्रिकेट किती अवघड आणि कठिण फॉरमॅट आहे याला मान्यता देणारं एक पाऊल आहे.'

'कसोटी क्रिकेट खेळणं इतकं सोपं नाही. आपण 100 कसोटी सामने खेळल्यानंतर ज्या प्रकारे सेलिब्रेशन करतो त्या प्रकारे 100 टी 20 सामने खेळल्यावर करतो का? हा काही प्रोत्साहन भत्ता नाही तर हे बक्षीस आहे.'