CWG 2022 : भारताच्या कुस्ती मोहिमेला आजपासून सुरुवात

बर्मिंगहॅम : भारतीय कुस्तीपटू सज्ज झाले आहेत. बर्मिंगहॅम राष्ट्रकुल क्रीडा स्पर्धांमधील कुस्ती या खेळाच्या मोहिमेला आजपासून सुरुवात होणार आहे. पुरुष व महिला अशा दोन्ही गटांत मिळून भारताचे १२ खेळाडू यामध्ये सहभागी झाले आहेत. २०१८ मध्ये गोल्ड कोस्ट येथे झालेल्या राष्ट्रकुल क्रीडा स्पर्धांमधील कुस्ती या खेळामध्ये भारताचे १२ कुस्तीपटू सहभागी झाले होते. या बाराही खेळाडूंनी त्यावेळी पदक जिंकले होते. भारतीय खेळाडूंनी पाच सुवर्ण, तीन रौप्य व चार ब्राँझपदकांवर मोहोर उमटवली होती. यंदाही भारतीय कुस्तीपटूंनी तीच अपेक्षा बाळगली आहे.

कुस्तीमधील भारताची कामगिरी

राष्ट्रकुल क्रीडा स्पर्धांमध्ये सर्वाधिक पदक जिंकणाऱ्या देशांच्या यादीत ऑस्ट्रेलिया, इंग्लंड व कॅनडा या देशांनंतर भारताचा क्रमांक लागतो. बर्मिंगहॅम येथील राष्ट्रकुल क्रीडा स्पर्धांआधी भारताने एकूण ५०३ पदके पटकावली होती. भारताने नेमबाजी या खेळामधून सर्वाधिक १३५ पदके जिंकली आहेत. त्यानंतर वेटलिफ्टिंग या खेळामधून १२५ पदकांवर मोहोर उमटवण्यात भारतीय खेळाडूंना यश लाभले आहे. कुस्ती या खेळामधून भारताने आतापर्यंत १०२ पदकांची माळ आपल्या गळ्यात घातली आहे. याचा अर्थ भारताने कुस्ती या खेळामधून पदकांची लयलूट केली आहे.

सहभागी होणारे कुस्तीपटू

पुरुष विभाग

रवी दहीया, बजरंग पुनिया, नवीन, दीपक पुनिया, दीपक, मोहित ग्रेवाल

महिला विभाग

पूजा गेहलोत, विनेश फोगाट, अंशू मलिक, साक्षी मलिक, दिव्या काकरन, पूजा सिहाग

हे कुस्तीपटू पदकासाठी प्रबळ दावेदार

पुरुष विभागात रवी दहीया, बजरंग पुनिया, दीपक पुनिया व महिला विभागात विनेश फोगाट, अंशू मलिक, दिव्या काकरन व साक्षी मलिक या कुस्तीपटूंकडे पदकासाठीचे प्रबळ दावेदार म्हणून बघितले जात आहे.