French Open : आज टेनिस विश्‍वातील नव्या पर्वाची नांदी? जोकोविच-अल्काराझ उपांत्य फेरीत लढणार

Djokovic vs Alcaraz French Open semifinal : सर्वाधिक २२ ग्रँडस्लॅम जिंकलेला नोवाक जोकोविच आणि एक ग्रॅंडस्लॅम विजेता कार्लोस अल्काराझ यांच्यामध्ये आज फ्रेंच ओपन टेनिस ग्रँडस्लॅम पुरुष एकेरीचा उपांत्य फेरीचा सामना रंगणार आहे. ३६ वर्षीय जोकोविच व २० वर्षीय अल्काराझ यांच्यामधील ही लढत नव्या युगाची नांदी ठरणार का, असा प्रश्‍न याप्रसंगी निर्माण झाला आहे.

रॉजर फेडररने आंतरराष्ट्रीय टेनिसमधून निवृत्ती घेतली. राफेल नदाल दुखापतीमुळे या स्पर्धेमध्ये खेळू शकलेला नाही. त्याचे पुनरागमन पुढल्या वर्षी होण्याचे संकेत मिळाले आहेत. याच पार्श्वभूमीवर जोकोविचवर ‘बिग थ्री’चे वर्चस्व कायम राखण्याची जबाबदारी आहे. स्पेनच्या अल्काराझकडे टेनिसच्या या युगातील नवा तारा म्हणून बघितले जात आहे. त्यामुळे उद्या (ता. ९) होणाऱ्या या लढतीकडे तमाम टेनिसप्रेमींच्या नजरा खिळल्या आहेत.

इतिहास युवा खेळाडूच्या बाजूने

नोवाक जोकोविच-कार्लोस अल्काराझ यांच्यामध्ये आतापर्यंत एक लढत पार पडली आहे. २०२२ मध्ये माद्रिद ओपन या स्पर्धेमध्ये ते एकमेकांसमोर उभे ठाकले होते. या लढतीत अल्काराझ याने बाजी मारली. अल्काराझ याने ही लढत ६-७, ७-५, ७-६ अशी जिंकली.

तुम्हाला सर्वोत्तम व्हायचे असेल तर तुम्हाला अव्वल दर्जाचा खेळ करणाऱ्या खेळाडूला हरवावेच लागते. कार्लोस अल्काराझ हा अप्रतिम खेळ करीत आहे. त्याला पराभूत करायला नक्कीच आवडेल. टेनिसकोर्टवर खेळताना त्याची तीव्रता त्याच्याच देशातील राफेल नदालसारखी जाणवते. - नोवाक जोकोविच