सूर्यकुमार यादवने ठोकले धमाकेदार शतक, रोहित-रैनाच्या यादीत समावेश

Eng vs Ind Suryakumar Yadav Hits Century : नॉटिंगहॅम येथे झालेल्या तिसऱ्या T20 सामन्यात इंग्लंडने भारतावर 17 धावांनी विजय मिळवला. या पराभवानंतरही टीम इंडियाने ही मालिका 2-1 अशी जिंकली आहे. 216 धावांच्या लक्ष्याचा पाठलाग करताना भारताकडून सूर्यकुमार यादवने 24 व्या आंतरराष्ट्रीय सामन्यात पहिले शतक झळकावले. त्याने 48 चेंडूत 12 चौकार आणि पाच षटकारांच्या मदतीने शतक पूर्ण केले. सूर्यकुमार यादव टी-20 आंतरराष्ट्रीय क्रिकेटमध्ये शतक झळकावणारा भारताचा 5वा खेळाडू ठरला आहे. त्याच्या आधी सुरेश रैना, रोहित शर्मा, केएल राहुल आणि दीपक हुड्डा यांनी ही कामगिरी केली आहे.

सामन्याबद्दल बोलायचं झालं तर, इंग्लंडने नाणेफेक जिंकून प्रथम फलंदाजी करण्याचा निर्णय घेतला. इंग्लंडचे सलामीवीर जेसन रॉय आणि कर्णधार जोस बटलर यांनी भारतीय संघात भुवनेश्वर कुमार आणि जसप्रीत बुमराह यांच्या अनुपस्थितीचा पुरेपूर फायदा उठवत इंग्लंडला चांगली सुरुवात करून दिली. डेव्हिड मलानचे (77) स्फोटक अर्धशतक आणि लियाम लिव्हगस्टीनच्या नाबाद 42 धावांच्या जोरावर इंग्लंडने 20 षटकांत 7 बाद 215 अशी भक्कम धावसंख्या उभारली.

216 धावांच्या लक्ष्याचा पाठलाग करताना भारताची सुरुवात खराब झाली. ऋषभ पंत (1), विराट कोहली (11), कर्णधार रोहित शर्मा (11) आणि दिनेश कार्तिक (6) लवकर पॅव्हेलियनमध्ये परतले. मात्र सूर्यकुमारने अवघ्या 48 चेंडूत शतक झळकावले. चौथ्या क्रमांकावर शतक झळकावणारा तो केएल राहुलनंतर दुसरा भारतीय फलंदाज ठरला आहे. इंग्लंडने शेवटचा T20 सामना 17 धावांनी जिंकला, भारताने मालिका 2-1 ने जिंकली.