IND vs ENG 'विराट' मासा लागला सॅमच्या गळाला; टीम इंडिया संकटात

England vs India, 2nd Test : लॉर्ड्सच्या मैदानात सुरु असलेल्या कसोटी सामन्यात भारतीय संघ अडचणीत सापडलाय. रोहित शर्मा आणि लोकेश राहुलसह कर्णधार विराट कोहली स्वस्तात माघारी परतला आहे. इंग्लंडच्या संघाने 27 धावांची अल्प आघाडी घेतली होती. ही आघाडी भेदून इंग्लंडसमोर टार्गेट ठेवण्यासाठी रोहित आणि लोकेश राहुल यांनी भारताच्या दुसऱ्या डावाला सुरुवात केली. पहिल्याच सत्रातील 10 व्या षटकात मार्क वूडने पहिल्या डावातील शतकवीर लोकेश राहुलला अवघ्या 5 धावांवर माघारी धाडले. त्याच्यापाठोपाठ मार्क वूडने रोहित शर्मालाही 21 धावांवर बाद केले. डाव सावरण्याची जबाबदारी पुजारा आणि कर्णधार विराट कोहलीच्या खांद्यावर येऊन पडली.

सॅम कुरेननं विराट कोहलीच्या रुपात टीम इंडियाला मोठा धक्का दिला. 20 धावांवर खेळत असताना सॅम कुरेनचा चेंडू विराटच्या बॅटची कड घेऊन यष्टीमागे असलेल्या जोस बटलरच्या हातात विसावला. विराटची विकेट मिळाल्यानंतर सॅम कुरेननं जोरदार सेलिब्रेशन केल्याचे पाहायला मिळाले. पहिल्या सेशनमध्ये भारतीय संघाने 25 षटकांच्या खेळात तीन विकेटच्या मोबदल्यात 56 धावा केल्या आहेत. भारतीय संघाने 29 धावांची आघाडी घेतली असून उपकर्णधार अजिंक्य रहाणे 1 (8) आणि पुजारा 3 (48) धावांवर खेळत होते.

पहिल्या डावात रोहित शर्मा आणि लोकेश राहुल यांनी शतकी भागीदारी केली होती. या जोडीकडून पुन्हा एकदा त्याच धमाकेदार खेळीची अपेक्षा होती. मार्क वूडने सलामीवीर लोकेश राहुलला गतीने चकवा दिला. तो यष्टीरक्षक बटलरकडे झेल देऊन परतला. मार्क वू़डच्या चेंड़ूवरच रोहित शर्मानेही मोईन अलीकडे झेल दिला. या दोघांसह कर्णधार विराट कोहलीच्या खेळीच्या जोरावर भारतीय संघाने पहिल्या डावात 364 धावा केल्या होत्या. तिघेही तंबूत परतल्यामुळे सामना वाचवण्याचे मोठे आव्हान टीम इंडियासमोर आहे. पुजारा आणि अजिंक्य रहाणे पहिल्या कसोटी सामन्यासह पहिल्या डावात नावाला साजेसा खेळ करु शकलेले नाहीत. या दोघांवरही टीका होत असताना ते आता आपल्यातील क्षमता सिद्ध करुन ही जोडी टीकाकारांना बॅटने उत्तर देणार का? हे पाहणे महत्त्वाचे ठरेल.