मॅराडोनाची विकणार संपत्ती, व्हिलापासून सिगारचाही समावेश

अर्जेंटिनाचा दिग्गज फुटबॉलपटू डिएगो मॅराडोना (Diego Maradona) याच्या संपत्तीचा आज लिलाव होणार आहे. २०२० मध्ये त्याचा मृत्यू झाला होता. त्यानंतर त्याच्या जवळपास ९० वस्तूंचा आज लिलाव (Auction) होणार आहे. या वस्तूंच्या लिलावाचं आयोजन करणारे एड्रियन मर्काडो (Adrian Mercado) यांनी शनिवारी सांगितलं की, आमच्याकडे 1120 लोकांनी नोंदणी केली केली असून ते लिलावात बोली लावण्याच्या तयारीत आहेत. अर्जेंटिनाच्या अधिकार्‍यांनी मॅराडोनाच्या संपत्तीच्या वारसांशी करार करून विक्रीचे आदेश दिले होते.

या वस्तूंचा होणार लिलाव

मॅराडोनाने आपल्या आई-वडिलांना १९८० च्या दशकात ब्युनोस आयर्सचा व्हिला डेव्होटो (Villa Devoto) हा व्हिला भेट म्हणून दिला होता. तिथे मॅराडोना मृत्यूपर्यंत राहत होता. या व्हिलाचा लिलाव होणार आहे. तेथे एक स्विमिंग पूलही आहे. यासाठी $900,000 ची किमान बोली निश्चित करण्यात आली आहे. याव्यतिरिक्त 2017 आणि 2016 च्या मॉडेल्स असलेल्या दोन बीएमडब्ल्यूसाठी 225,000 आणि 165,000 डॉलर किमान बोली लावण्यात आली आहे. तसेच 38,000 डॉलरची मूळ किंमत असलेली Hyundai व्हॅनचाही लिलाव करण्यात येणार आहे. ब्युनोस आयर्सच्या दक्षिणेस एक दोन बेडरूमचे अपार्टमेंट असून त्याची मूळ किंमत $65,000 आहे. क्युबातील दिवंगत नेते फिदेल कास्त्रो यांच्यासोबतचा मॅराडोना चा एक फोटो आणि क्युबा सिगार, कास्त्रो यांनी सही केलेल्या हस्तलिखित पत्राचाही (Handwritten Letter) आजच्या लिलावात समावेश असणार आहे. याविषयी एड्रियन मर्काडो म्हणाले की, ऑफर केल्या जाणार्‍या 87 लॉटमध्ये कमीत कमी बोली $50 ते $900,000 पर्यंत लावल्या जातील.