Hong Kong Open : हाँगकाँगमध्ये अजूनही कोरोना विलगीकरण, सलग तिसऱ्या वर्षी स्पर्धा रद्द

Hong Kong Badminton Open : बॅडमिंटन वर्ल्ड फेडरेशनने (BWF) आज स्पष्ट केले की नोव्हेंबरमध्ये होऊ घातलेली हाँगकाँग बॅडमिंटन ओपन स्पर्धात सलग तिसऱ्या वर्षी रद्द करण्यात येत आहे. BWF ने हाँगकाँगमधील सक्तीचे आणि गुंतागुंतीचे विलगीकरण नियम यामुळे ही स्पर्धा रद्द करत असल्याचे सांगितले. (Corona Quarantine Restriction)

हाँगकाँग सुपर 500 स्पर्धा ही कोवलून येथे 8 नोव्हेंबर ते 13 नोव्हेंबर यादरम्यान खेळवण्यात येणार होती. दरम्यान, 'हाँगकाँग बॅडमिंटन असोसिएशन ही स्थानिक प्रशासनाशी सहभागी खेळाडूंच्या विलगीकरण नियमात सूट मिळावी म्हणून चर्चा करत आहे.' असे वक्तव्य BWF ने आपल्या प्रसिद्धीपत्रकात केले आहे.

असे असले तरी परदेशी व्यक्तींसाठी सक्तीचे विलगीकर अजूनही आहेच. त्यामुळे हाँगकाँग बॅडमिंटन असोसिएशनने स्पर्धा रद्द करण्याशिवाय कोणता पर्याय नसल्यांचे सांगितले. हाँगकाँग हे असे ठिकाण आहे जिथे बाहेरच्या देशातून प्रवास करून येणाऱ्या व्यक्तींचे सक्तीचे विलगीकरण केले जाते. नुकतेच त्यांनी हा विलगीकरणाचा कालावधी 7 दिवसांवरून तीन दिवसांवर आणला आहे.

आशियाचे आर्थिक केंद्र म्हणून ओळखले जाणारे हाँगकाँग हळूहळू कोरोना महामारीत घातलेले कडक निर्बंध शिथील करत आहे. हाँगकाँग ओपन बरोबरच मकाऊ ओपन सुपर 300 स्पर्धा देखील सलग तिसऱ्या वर्षी रद्द करण्यात आली आहे. ही स्पर्धा 1 नोव्हेंबर ते 6 नोव्हेंबर दरम्यान होणार होती. मकाऊ बॅडमिंटन फेडरेशनने सांगितले की, प्रवास आणि शहरात प्रवेश करण्यावर असलेल्या निर्बंधामुळे ही स्पर्धा रद्द करण्यात येत आहे. सध्या BWF World Tour ची जपान ओपन ओसाकामध्ये सुरू आहे. ही स्पर्धा रविवारी संपेल.