U19 World Cup : विकीचा 'पंजा'; धूल सेननं उडवला आफ्रिकेचा धुरळा!

ICC Under 19 World Cup 2022 : भारतीय युवा संघाने अंडर 19 वर्ल्ड कप स्पर्धेत विजयी सलामी दिलीये. वेस्ट इंडींडमध्ये सुरु असलेल्या अंडर वर्ल्ड कप स्पर्धेतील पहिल्या सामन्यात भारतीय संघाने पहिल्यांदा बॅटिंग करताना दक्षिण आफ्रिकेसमोर 233 धावांचे लक्ष्य ठेवले होते. या धावांचा पाठलाग करताना आफ्रिकेचा संघ 187 धावांत आटोपला. भारतीय संघाने सलामीच्या लढतीत 45 धावांनी विजय नोंदवला आहे. या विजयासह भारतीय संघाने ब गटात अव्वलस्थान पटकावले आहे. (ICC Under 19 World Cup 2022 India U19 Beat South Africa U19 Opening Match)

भारताकडून विकीनं (Vicky Ostwal) दक्षिण आफ्रिकेचा अर्धा संघ तंबूत धाडला. त्याने 10 षटकात 28 धावा खर्च करून 5 विकेट घेतल्या. दक्षिण आफ्रिकेकडून Dewald Brevis 65 (99) आणि कॅप्टन George Van Heerden 36 (61) व्यतिरिक्त अन्य कोणत्याही फलंदाजाचा भारतीय माऱ्यासमोर निभाव लागला नाही.

दक्षिण आफ्रिकेच्या संघाने टॉस जिंकून पहिल्यांदा गोलंदाजी करण्याचा निर्णय घेतला होता. पहिल्यांदा बॅटिंग करताना भारतीय संघाची सुरुवात खराब झाली. सलामीवीर रघुवंशी (Angkrish Raghuvanshi) 5 (15) आणि हरनूर सिंग (Harnoor Singh) 1(3) ही जोडी स्वस्तात माघारी परतली. 2 बाद 11 अशी धावसंख्या असताना कर्णधार यश धूल (Yash Dhull) आणि राशिद ( Shaik Rasheed) यांनी 77 धावांची महत्त्वपूर्ण भागीदारी रचली.

तिसऱ्या विकेटच्या या भागीदारीने भारतीय संघाचा डाव सावरला. राशिद 31 धावांवर बाद झाला. यश थूल शतकी खेळी करेल असे वाटत असताना तो 82 धावांवर बाद झाला. त्यानंतर कुशल सिंधूनं 25 चेंडूत 27 धावा आणि कुशल तांबेनं तळाच्या फलंदाजीत 44 चेंडूत केलेल्या 35 धावांच्या जोरावर भारतीय संघाने 46.5 षटकात 232 धावा केल्या होत्या.