SA vs IND : पावसामुळं दुसऱ्या दिवसाचा खेळ पाण्यात

India vs South Africa (IND vs SA) 1st Test : भारत आणि दक्षिण आफ्रिका यांच्यातील पहिल्या कसोटी सामन्याच्या दुसरा दिवस पावसाने गाजवला. दुसऱ्या दिवशी खेळाडू मैदानात उतरण्यापूर्वीच दिवस संपल्याची घोषणा करण्यात आली. सेंच्युरियनच्या सुपरस्पोर्ट पार्क स्टेडियमवर पहिला कसोटी सामना सुरु आहे.

सोमवारी पावसामुळे एकही चेंडू फेकला गेला नाही. भारतीय संघाकडून केएल राहुल (KL Rahul) च्या शतकी खेळीच्या जोरावर भारतीय संघाने सामन्यावर पहिल्यापासून मजबूत पकड मिळवली आहे. पहल्या दिवसाअखेर भारतीय संघाने 3 बाद 272 धावा केल्या होत्या. लोकेश राहुल 122 आणि अजिंक्य रहाणे 40 धावांवर खेळत होते. दुसऱ्या दिवसाअखेर परिस्थिती जैसे थी आहे.

भारताकडून मयांकसह राहुल अजिंक्यची लक्षवेधी खेळी

दक्षिण आफ्रिके विरुद्धच्या पहिल्या कसोटी सामन्यात मयंक अग्रवाल आणि लोकेश राहुल जोडीनं पहिल्या विकेटसाठी विक्रमी भागीदारी रचली. दोघांनी पहिल्या विकेटसाठी 117 धावा केल्या. मयंकने 123 चेंडूत 60 धावा करुन तंबूचा रस्ता धरला. त्याची जागा घेण्यासाठी मैदानात उतरलेल्या पुजाराला खातेही उघडता आले नाही. कोहलीने 94 चेंडूत 35 धावांची खेळी केली.

लुंगी एनिग्डिनं सोडली छाप

भारतीय संघाचा कर्णधार विराट कोहलीने खेळपट्टीवर हिरवळ दिसत असतानाही बॅटिंग करण्याचा निर्णय घेतला. सलामीवीरांनी त्याचा निर्णय सार्थ ठरवला. दक्षिण आफ्रिकेचे गोलंदाज घरच्या मैदानावर भारतीय फलंदाजांसमोर आव्हान निर्माण करतील, असे वाटत होते. पण यात ते अपयशी ठरले. एनिग्डीनं एकट्याने पहिल्या तीन विकेट मिळवून दिल्या. त्याच्याशिवाय अन्य गोलंदाज सपशेल अपयशी ठरले.