IND vs NZ : मालिका विजयाची सप्तपदी! भारताने नंबर 1 न्यूझीलंडला चारली पराभवाची धूळ

India Register 7th ODI Series Win In Home : भारताने न्यूझीलंडविरूद्धच्या दुसऱ्या वनडे सामन्यात दमदार कामगिरी करत न्यूझीलंडचा सहस पराभव केला. भारताने तीन सामन्यांच्या मालिकेतील पहिले दोन सामने जिंकून मालिका आपल्या खिशात टाकली आहे. भारताचा हा मायदेशातील सातवा वनडे मालिका विजय आहे. याचबरोबर भारताने आयसीसी रँकिंगमध्ये अव्वल स्थानावर असलेल्या न्यूझीलंडचा पराभव करण्याची किमया केली आहे.

भारताची डिसेंबर 2019 पासूनची मायदेशातील वनडे मालिकेतील कामगिरी

वेस्ट इंडीजचा 2 - 1 असा पराभव

ऑस्ट्रेलियाचा 2 - 1 असा पराभव

इंग्लंडचा 2 - 1 असा पराभव

वेस्ट इंडीजचा 3 - 0 असा पराभव

दक्षिण आफ्रिकेचा 2 - 1 असा पराभव

श्रीलंकेचा 3 - 0 असा पराभव

न्यूझीलंडचा 2 - 0 असा पराभव (मालिकेतील एक सामना अजून शिल्लक आहे.)

भारताने दुसऱ्या वनडे सामन्यात न्यूझीलंडचा 8 विकेट्स राखून पराभव करत मालिकेत 2 - 0 अशी विजयी आघाडी घेतली. न्यूझीलंडने भारतासमोर विजयासाठी 109 धावांचे माफक आव्हान ठेवले होते. भारताकडून रोहित शर्माने 50 चेंडूत 51 धावांची दमदार खेळी केली. तर शुभमन गिलने नाबाद 40 धावांची खेळी करत भारताच्या विजयावर 21व्या षटकातच शिक्कामोर्तब केले.

भारताने दुसऱ्या वनडे सामन्यात न्यूझीलंडला अवघ्या 108 धावात गुंडाळले. रायपूरच्या फ्रेश विकेटवर भारतीय वेगवान गोलंदाजांनी किवींची अवस्था 5 बाद 15 धावा अशी केली होती. मोहम्मद शमी आणि मोहम्मद सिराज यांनी सुरूवातीला किवींना धक्के दिले.

त्यानंतर ग्लेन फिलिप्सने आधी मायकेल बार्सवेल आणि नंतर मिचेल सँटनरसोबत छोटी भागीदारी रचत संघाला शतकी मजल मारून दिली. मात्र हार्दिक पांड्या, शार्दुल ठाकूर यांनी न्यूझीलंडची मधील फळी कापून काढली. त्यांना वॉशिंग्टन सुंदर आणि कुलदीप यादव यांनी चांगली साथ देत शेपुट गुंडाळात किवींचा डाव 108 धावात संपवला.

भारताकडून मोहम्मद शमीने सर्वाधिक 3 विकेट्स घेतल्या. त्यानंतर हार्दिक पांड्या आणि वॉशिंग्टन सुंदर यांनी प्रत्येकी 2 विकेट्स पटकावल्या. शार्दुल ठाकूर आणि कुलदीप यादव यांनी प्रत्येकी 1 विकेट घेत चांगली साथ दिली. न्यूझीलंडकडून ग्लेन फिलिप्सने सर्वाधिक 36 धावा केल्या.