लक्ष्मण होणार इंडियाचा हेड कोच? द्रविडच्या जागी मिळणार मोठी जबाबदारी

आयपीएल 2022 संपल्यानंतर टीम इंडियाला आफ्रिका संघाविरुद्ध 5 सामन्यांची टी-20 मालिका खेळायची आहे. त्याआधीच व्हीव्हीएस लक्ष्मणबद्दल एक मोठी बातमी समोर येत आहे. भारत आणि दक्षिण आफ्रिका यांच्यात 9 जून ते 19 जून दरम्यान टी-20 मालिका खेळवली जाणार आहे. त्याआधी टीम इंडियाच्या कोचिंगची जबाबदारी व्हीव्हीएस लक्ष्मणकडे दिल्याच्या बातम्या समोर येत आहेत. (india vs sa t20 series team india coach rahul dravid)

दक्षिण आफ्रिकेविरुद्धच्या घरच्या टी-20 मालिका आणि आयर्लंडविरुद्धच्या टी-20 मालिकेसाठी व्ही.व्ही.एस लक्ष्मणला भारतीय संघाचे प्रशिक्षक बनवले जाऊ शकते. भारताला 26 जून ते 28 जून दरम्यान आयर्लंडविरुद्ध दोन सामन्यांची टी-20 मालिका खेळायच्या आहे.

दरम्यान भारतीय संघाचे नियमित प्रशिक्षक राहुल द्रविड 15 किंवा 16 जून रोजी वरिष्ठ खेळाडूंच्या संघासह इंग्लंड दौऱ्यावर रवाना होऊ शकतात. येथे भारताला 1 कसोटी, 3 एकदिवसीय सामने आणि 3 सामन्यांची T20 मालिका खेळायची आहे. त्यामुळे राहुल द्रविड त्या मध्ये खूप व्यस्त असणार आहे. द्रविड सर्व मालिकांसाठी उपलब्ध होणार नाहीत. त्यामुळेच व्हीव्हीएस लक्ष्मणकडे ही जबाबदारी दिल्याची चर्चा आहे.

दक्षिण आफ्रिकेविरुद्धच्या घरच्या टी-20 मालिकेत वरिष्ठ खेळाडूंना विश्रांती दिली जाऊ शकते, त्यामध्ये शिखर धवनकडे युवा टीम इंडियाचे कर्णधारपद सोपवले जाऊ शकते. दक्षिण आफ्रिकेविरुद्धच्या घरच्या टी-20 मालिकेत निवडकर्ते अधिकाधिक युवा खेळाडूंना घेऊ शकतात. केएल राहुल, जसप्रीत बुमराह, रोहित शर्मा, विराट कोहली आणि ऋषभ पंत हे खेळाडू इंग्लंड दौऱ्यासाठी रवाना होणार्‍या टीम इंडियाचे नियमित प्रशिक्षक राहुल द्रविड यांच्यासह वरिष्ठ संघाचा भाग असतील.