Ind vs Zim ODI : महाराष्ट्राचे खेळाडू संधीच्या प्रतीक्षेत; असा असेल इंडियाचा प्लेइंग-11

Zimbabwe vs India 3rd ODI : के. एल. राहुलच्या नेतृत्वाखाली भारतीय क्रिकेट संघाने पहिल्या दोन लढतींमध्ये अपेक्षेप्रमाणे विजय संपादन करून तीन एकदिवसीय सामन्यांची मालिका 2-0 अशा फरकाने खिशात घातली आहे. त्यामुळे आता झिम्बाब्वेविरुद्धच्या आज होणाऱ्या अखेरच्या लढतीत टीम इंडियामध्ये राखीव खेळाडूंना संधी मिळण्याची शक्यता अधिक आहे. यजमान झिम्बाब्वे संघ प्रतिष्ठा राखण्यासाठी या लढतीत मैदानात उतरणार आहे.

आशियाई करंडकाच्या पार्श्वभूमीवर कर्णधार के. एल. राहुलला फलंदाजीचा सराव करणे अनिवार्य आहे. आयपीएलनंतर तो दुखापत व कोरोनामुळे संघाबाहेरच राहिला आहे. त्यामुळे आशियाई करंडकात थेट उतरवण्याची जोखीम संघ व्यवस्थापन घेईल असे वाटत नाही. पहिल्या लढतीत भारतीय संघ १० गडी राखून विजयी झाला. दुसऱ्या लढतीत राहुलला फलंदाजीचा सराव करण्याची संधी होती, पण व्हिक्टर एनयॉचीच्या गोलंदाजीवर तो १ धावेवरच पायचीत बाद झाला. इशान किशनलाही मोठी धावसंख्या उभारता आली नाही. शिखर धवन, शुभमन गिल, दीपक हूडा व संजू सॅमसन यांनी चमक दाखवली आहे. मोहम्मद सिराज, प्रसिद्ध कृष्णा, दीपक चहर, शार्दुल ठाकूर, कुलदीप यादव यांनी चोख कामगिरी केली आहे.

ऋतुराज, राहुल हे खेळाडू प्रतीक्षेत

ऋतुराज गायकवाड व राहुल त्रिपाठी हे महाराष्ट्राचे खेळाडू संधीच्या प्रतीक्षेत आहेत. पहिल्या दोन्ही लढतींमध्ये त्यांना संधी मिळाली नाही. शिखर धवन, के. एल. राहुल व शुभमन गिल या अनुभवी खेळाडूंना ऋतुराजआधी सलामीवीर किंवा मधल्या फळीत संधी मिळाली आहे; मात्र मालिका जिंकली असल्यामुळे आता आज तरी ऋतुराजला अंतिम अकरामध्ये संधी देणे अपेक्षित आहे.