VIDEO : स्मृतीनं घेतलेला जबऱ्या कॅच एकदा पाहाच

भारतीय संघाची सलामीची फलंदाज स्मृती मानधनाने इंग्लंड विरुद्धच्या तिसऱ्या वनडेत लयीत दिसली. अर्धशतकाच्या उंबरठ्यावर असताना सारा ग्लेन हिने तिलाच पायचित केले. अवघ्या एका धावनं तिचं अर्धशतक हुकले. तिने 57 चेंडूत 8 चौकाराच्या मदतीने 49 धावांची खेळी केली. बॅटिंगला येण्यापूर्वी तिने अप्रतिम क्षेत्ररक्षणाने लक्ष वेधून घेतले. इंग्लंडच्या डावातील 38 व्या षटकात स्मृती मानधनाने कमालीचा कॅच पकडला. हा व्हिडिओ सोशल मीडियावर चांगलाच व्हायरल होताना दिसतोय. (India Women vs England Women 3rd ODI Smriti Mandhana Take Brilliant Catch Of Natalie Sciver Watch Video)

भारतीय संघाची कर्णधार मिताली राज हिने तिसऱ्या आणि अखेरच्या सामन्यात टॉस जिंकून गोलंदाजी करण्याचा निर्णय घेतला. फिल्डिंगवेळी स्मृतीने नॅटली सिवर हिचा अप्रतिम कॅच घेतल्याचे पाहायला मिळाले. स्मृतीने डाइव्ह मारत घेतलेल्या जबरदस्त कॅचमुळे नॅटलीला 49 धावांवर तंबूचा रस्ता धरावा लागला. दीप्ति शर्माच्या गोलंदाजीवर स्मृतीने आपल्यातील फिल्डिंगचा अप्रतिम नजराणा पेश केला.

वॉर्सेस्टरच्या मैदानात रंगलेल्या सामन्यात पावसाचा व्यत्यय आल्यामुळे 47-47 षटकांचा सामना खेळवण्यात आला. मिताली राजने टॉस जिंकून फिल्डिंगचा निर्णय घेतला. इंग्लंडची कर्धार हिथर नाईट 46, लॉरेन्स विनफील्ड 36 धावा करुन परतल्यानंतर नॅटली सिवरने 49 धावांची खेळी केली. अर्धशतकाच्या उंबरठ्यावर स्मृती मानधनाने तिचा जबरदस्त कॅच घेतला. त्यानंतर इंग्लंडचा संघ कोलमडला. 219 धावांत संघ आटोपला. भारतीय संघाने या धावांचा पाठलाग करत सामना खिशात घातला. अप्रतिम फिल्डिंगनंतर स्मृतीने फलंदाजीतही मोलाचे योगदान दिले. तिने 49 धावा करुन संघाचा डाव सावरला. टी-20 मालिकेपूर्वी स्मृतीच्या ताफ्यातून पाहायला मिळालेली फटकेबाजी भारतीय संघासाठी फायदेशीर अशीच आहे.