Wrestling News WFI : इंडियन ऑलिम्पिक असोसिएशनने कुस्ती महासंघाची अ‍ॅड हॉक समिती केली विसर्जित

Indian Olympic Association : भारतीय ऑलिम्पिक असोसिएशनने भारतीय कुस्ती महासंघाबाबत एक मोठा निर्णय घेतला आहे. त्यांनी भारतीय कुस्ती महासंघाचा कारभार पाहणारी तदर्थ समिती विसर्जित केली आहे. काही दिवसांपूर्वी केंद्रीय क्रीडा मंत्रालयाने WFI ची नवीन कार्यकारणी बर्खास्त केली होती. त्यानंतर भारतीय ऑलिम्पिक असोसिएशनने कुस्ती महासंघाचा दैनंदिन कारभार पाहण्यासाठी तदर्थ समिती (Ad-Hoc Committee) स्थापन केली होती.

UWW ने भारतीय कुस्ती महासंघाची सदस्यता केली बहाल

या महिन्यात युनायटेड वर्ल्ड रेसलिंगने भारतीय कुस्ती महासंघाची सदस्यता बहाल केली होती. गेल्या वर्षी ऑगस्ट महिन्यात WFI च्या अध्यक्षपदाची निवडणूक वेळेत न झाल्याने UWW सदस्यता रद्द केली होती. मात्र त्यानंतर झालेल्या बैठकीत UWW ने काही अटी शर्तींसह WFI ची सदस्यता पुन्हा बहाल करण्याचा निर्णय घेतला.

विनेश, बजरंग आणि साक्षीने केला होता विरोध

विनेश फोगाट, बजरंग पुनिया आणि साक्षी मलिक सारख्या स्टार कुस्तीपटूंनी WFI चे माजी अध्यक्ष बृजभूषण शरण सिंह यांच्याविरूद्ध लैंगिक अत्याचाराचा आरोप केला होता. त्यानंतर त्यांनी बृजभूषण यांच्याविरूद्ध प्रदर्शन केले होते. त्यांनी बृजभूषण यांना पदावरून हटवण्याची मागणी केली होती.

नुकतीच झाली होती ट्रायल

तदर्थ समितीच्या नेतृत्वाखील पुरूष आणि महिलांच्या कुस्ती चाचणी स्पर्धा नुकत्याच पार पडल्या आहे. पुरूषांमध्ये बजरंग पुनियाला पराभवाचा सामना करावा लागला तर महिलांमध्ये मोठ्या ड्राम्यानंतर विनेश पोगाटने विजय मिळवला होता.

(Sports Latest News)