IPL 2022: ...तर कवडी मोलाचा रैना होईल गुजरात टायटन्सचा 'अनमोल रतन'

IPL 2022 Gujarat Titans: इंडियन प्रीमियर लीग (IPL) च्या 15 व्या हंगामाची उत्सुकता आता शिगेला पोहचली आहे. या महिन्याच्या 26 तारखेपासून आयपीएलचे बिगूल वाजणार आहे. स्पर्धा सुरु होण्यापूर्वीच यंदाच्या हंगामात पहिल्यांदाच मैदानात उतरणाऱ्या गुजरात टाइटन्सला मोठा धक्का बसलाय. इंग्लंडचा फलंदाज जेसन रॉयने आयपीएल 2022 च्या हंगामातून माघार घेतली आहे. बराच काळ बायो बबलमध्ये घालवल्याने थकवा जाणवत असल्याचे कारण सांगून त्याने स्पर्धेतू माघार घेण्याचा निर्णय घेतलाय.

इंग्लिश मॅनच्या या निर्णयानंतर मिस्टर आयपीएल स्पशलिस्ट सुरेश रैना चर्चेत आला आहे. जेसन रॉयची जागा भरून काढण्यासाठी गुजरातचा नवा संघ त्याला आपल्या ताफ्यात घेईल, अशी चर्चा रंगण्यास सुरुवात झाली आहे. याआधी राजस्थान रॉयल्स आणि चेन्नई सुपर किंग्स (CSK) या दोन संघाला स्पॉट फिक्सिंगच्या प्रकरणात 2 वर्षांची बंदी घालण्यात आली होती. त्यावेळी गुजरात लायन्स संघ दोन वर्ष आयपीएलमध्ये खेळताना दिसला होता.

यावेळी सुरेश रैनानेच या संघाचे नेतृत्व केले होते. यंदाच्या आयपीएल हंगामामध्ये रैनाला धक्का बसला. आधी चेन्नई सुपर किंग्जने त्याला रिलीज केले. त्यानंतर मेगा लिलावातही त्याला भाव मिळाला नाही. आयपीएलच्या इतिहासात सर्वाधिक धावा करणाऱ्या फलंदाजांच्या यादीत असलेल्या रैनाची 2 कोटी एवढी मूळ किंमत होती. पण त्याला संघात घेण्यासाठी कुणीही उत्सुकता दाखवली नाही.

जेसन रॉयने संघातून माघार घेतल्यानंतर सोशल मीडियावर रैनाच्या चाहत्यांनी रैनासाठी बॅटिंग सुरु केलीये. रैनाला संघात घ्या, अशा प्रतिक्रिया बघायला मिळत आहेत. गुजरात टाइटन्सने आतापर्यंत त्याच्या रिप्लेसमेंटचा कोणताही निर्णय घेतलेला नाही. हार्दिक पांड्याच्या नेतृत्वाखाली पहिल्यांदा मैदानात उतरणाऱअया गुजरात टायटन्सचा संघ रैनाला घेण्याची हिंम्मत दाखवणार का? हे पाहणे महत्त्वाचे ठरेल.