IPL 2023 : षटकांची गती न राखल्याने डुप्लेसीला १२ लाखांचा दंड

मुंबई - चिन्नास्वामी स्टेडियमवर अखेरच्या चेंडूपर्यंत थरारक झालेला लखनौविरुद्धचा सामना रॉयल चॅलेंजर्स बंगळूर संघाचा कर्णधार फाफ डुप्लेसीसाठी दुहेरी नुकसान करणारा ठरला.

बंगळूरने हातातोंडाशी आलेला सामना तर गमावलाच; त्यामुळे तीनपैकी दोन सामन्यात पराभूत होण्याची वेळ त्यांच्यावर आली. त्याच वेळी षटके निर्धारित वेळेत पूर्ण न केल्याबद्दल १२ लाखांचा दंडही करण्यात आला.

आयपीएलच्या नियमाप्रमाणे ९० मिनिटांच्या खेळात २० षटके पूर्ण करणे आवश्यक आहे. फाफ डुप्लेसी नेतृत्व करणाऱ्या बंगळूर संघाला ते जमले नाही. त्यामुळे आर्थिक दंडाची शिक्षा होण्याअगोदर जेवढा अधिक वेळ लागला तेवढा काळ पाचऐवजी चारच क्षेत्ररक्षक त्याला सीमारेषेवर ठेवता आले. या संधीचा फायदा लखनौच्या तळाच्या फलंदाजांनी घेतला.

आवेश खानलाही तंबी

स्वतःच्या बॅटमधून एकही धाव न काढता लखनौ संघाला अखेरच्या चेंडूवर विजय मिळवून देणाऱ्या आवेश खानने भावनेच्या भरात हेल्मेट मैदानावर आपटले, या कृतीबद्दल सामनाधिकाऱ्यांनी त्याला तंबी दिली आहे. नियमाचे उल्लंघन केल्याचे त्याने मान्य केले. पुन्हा अशी चूक झाल्यास त्याला आर्थिक दंड होऊ शकतो.