VIDEO : GT चा पहिला पराभव; शामीवर भडकला कर्णधार पांड्या

मुंबई : सनराईजर्स हैदराबादने आयपीएलच्या 21 व्या सामन्यात गुजरात टायटन्सचा (Gujarat Titans) आठ गडी राखून पराभव केला. हैदराबादने गुजराची विजयी घोडदौड रोखली. यापूर्वी गुजरात टायटन्सने सलग तीन सामने जिंकून हंगामाची दमदार सुरूवात केली होती. मात्र केन विल्यमसनच्या दमदार अर्धशतकी खेळी आणि निकोलस पूरनच्या आक्रमक फटकेबाजीमुळे गुजरातचे 163 धावांचे आव्हान हैदराबादने दोन गड्यांच्या मोबदल्यात पार केले. दरम्यान, गुजरातचा पहिला पराभव दिसू लागल्यावर हार्दिक पांड्याची (Hardik Pandya) सटकल्याचे दिसून आले. सध्या सोशल मीडियावर हार्दिक पांड्या मोहम्मद शामीवर (Mohammed Shami) भडकल्याचा व्हिडिओ व्हायरल होत आहे.

हैदराबाद ज्यावेळी गुजरात टायटन्सच्या 163 धावांचा पाठलाग करत होती त्यावेळी 13 व्या षटकात हार्दिक पांड्या गोलंदाजी करण्यास आला. हार्दिक पांड्याच्या गोलंदाजीवीर राहुल त्रिपाठीने (Rahul Tripathi) एक मोठा फटका मारण्याचा प्रयत्न केला. पण चेंडू हवेत उडाला. मोहम्मद शामीकडून हा कॅच मिस झाला. यानंतर हार्दिक पांड्या मोहम्मद शामीवर भडकला. याचा व्हिडिओ सध्या सोशल मीडियावर व्हायरल होत आहे. विशेष म्हणजे या षटकात केन विल्यमसनने हार्दिक पांड्याला सलग दोन षटकार मारले. त्यामुळे हार्दिक पांड्या जास्तच नाराज झाला होता. त्यातच षटकाचा शेवटचा चेंडू त्रिपाठीने हवेत मारला मात्र मोहम्मद शामीने हा हाफ चान्स घेण्याची तसदी घेतली नाही. त्यामुळे चेंडू शमीच्या पुढे टप्पा खाऊन हातात आला.

यानंतर हार्दिक पांड्या शामीवर भडकला. मात्र शामीने पांड्याच्या रिअॅक्शनवर फारसे लक्ष दिले नाही. मात्र ही बाब क्रिकेट चाहत्यांच्या डोळ्यातून सुटली नाही. त्यांनी मोहम्मद शामी सारख्या वरिष्ठ खेळाडूसोबत असे वर्तन करणाऱ्या हार्दिक पांड्याला सोशल मीडियावर ट्रोल करण्यास सुरूवात केली.

गुजरात टायटन्सने प्रथम फलंदाजी करत 7 बाद 162 धावा केल्या होत्या. त्यात कर्णधार हार्दिक पांड्याच्या नाबाद अर्धशतकाचा मोठा वाटा होता. यानंतर हैदराबादने गुजरातचे हे आव्हान 2 विकेट्सच्या मोबदल्यात पार केले. गुजरातचा हा हंगामातील पहिलाच पराभव आहे. तर हैदराबादने आला दुसरा विजय साजरा केला.