IPL 2021: राहुलचा CSKला दणका; 'प्ले-ऑफ्स'मध्ये चुरस वाढली!

IPL 2021 CSK vs PBKS: पंजाबचा कर्णधार लोकेश राहुल याच्या तडाखेबाज खेळीच्या जोरावर पंजाबने चेन्नईवर अवघ्या १३ षटकात विजय मिळवला. चेन्नईने प्रथम फलंदाजी करताना ६ बाद १३४ धावा केल्या होत्या. त्या आव्हानाचा पाठलाग करताना लोकेश राहुलने ४२ चेंडूत नाबाद ९८ धावा केल्या. पंजाबने या विजयासह १२ गुणांसह आपल्या नेट रनरेटमध्ये सुधारणा केली. आता उर्वरित तीन सामन्यांमध्ये जर कोलकाताने राजस्थानला पराभूत केले आणि मुंबईच्या संघाचाही उद्या पराभव झाला तर पंजाबला प्ले ऑफ्सचे तिकीट नक्की मिळू शकते.

असा रंगला सामना..

चेन्नईच्या संघाने प्रथम फलंदाजीला सुरूवात केली. सलामीवीर ऋतुराज गायकवाड १२ धावांत माघारी परतला. मोईन अली (०), रॉबिन उथप्पा (२), अंबाती रायडू (४) आणि धोनी (१२) या साऱ्यांनीही वाईट कामगिरी केली. पण सलामीवीर फाफ डू प्लेसिसने एक बाजू लावून धरत दमदार अर्धशतक ठोकलं. त्याने ५५ चेंडूत ७६ धावांची खेळी केली. त्यानंतर जाडेजा (नाबाद १५) आणि ब्राव्हो (नाबाद ४) यांनी संघाला २० षटकात ६ बाद १३४ धावांपर्यंत मजल मारू दिली.

या आव्हानाचा पाठलाग करणाऱ्या पंजाबला सामना जिंकण्यासोबतच नेट रनरेटचेही आव्हान होते. त्या दृष्टीने लोकेश राहुलने डावाची सुरूवात केली. त्याने तडाखेबाज खेळी करत आपल्या संघाला विजय मिळवून दिला. मयंक अग्रवाल (१२), सर्फराज खान (०), शाहरूख खान (८) आणि एडन मार्क्रम (१३) हे चौघे चांगली कामगिरी करू शकले नाहीत. पण राहुलने एक बाजूने खिंड लढवली. त्याने ४२ चेंडूत तब्बल ७ चौकार आणि ८ षटकारांसह नाबाद ९८ धावा कुटल्या आणि संघाला विजय मिळवून दिला.