VIDEO : कॅरेबियन गड्याचा भन्नाट कॅच; रॉयल इंग्लिश मॅनचा खेळ खल्लास!

पंजाब किंग्ज Punjab Kings (PBKS) च्या ताफ्यातील अष्टपैलू फॅबिन एलेनने (Fabian Allen) राजस्थान विरुद्धच्या सामन्यात क्षेत्ररक्षणाचा जबरदस्त नजराणा दाखवून दिला. लायम लिविंगस्टोनने फटकावलेला चेंडू सीमापार जाईल असे वाटत होते. पण कॅरेबियन खेळाडूने याचे झेलमध्ये रुंपातरित करत संघाला यश मिळवून देण्यात मोलाचा वाटा उचलला.

लुईस आणि संजू सॅमनची विकेट पडल्यानंतर इंग्लिश ताफ्यातील लिविंगस्टोन मैदानात उतरला. राजस्थानकडून पहिला सामना खेळणाऱ्या लिविंगस्टोनने चांगली सुरुवात केली. 17 चेंडूत 2 चौकार आणि एका षटकाराच्या मदतीने त्याने 25 धावा केल्या. तो पंजाबसाठी घातक ठरेल असे वाटत होते. पण अर्शदीपच्या गोलंदाजीवर उत्तुंग फटका मारण्याच्या नादात तो बाद झाला. अशक्यप्राय वाटणारा झेल टिपत कॅरेबियन खेळाडून सर्वांचे लक्ष वेधले.

लिविंग्टोनने जो पहिला सिक्सर मारला होता तो तब्बल 97 मीटर अंतरावर पडला होता. अर्शदिपच्या गोलंदाजीवर खेळलेला स्टोकही त्याच्या खात्यात 4 किंवा 6 धावा देऊन जाईल, असे वात होते. पण फॅबिन एलनने अप्रतिम झेल टिपत त्याच्या स्फोटक खेळीला ब्रेक लावला.

पंजाबचा कर्णधार लोकेश राहुलने टॉस जिंकून पहिल्यांदा गोलंदाजी करण्याचा निर्णय घेतला होता. राजस्थानच्या सलामी जोडीने अर्धशतकी भागीदारी करत संघाला दमदार सुरुवात करुन दिली. त्यानंतर लिविंगस्टोनने यशस्वी जयस्वालसह तिसऱ्या विकेटसाठी 48 धावांची खेळी केली. 30 चेंडूत दोघांनी 48 धावा करत पंजाबला बॅकफूटवर आणले. राजस्थानचा संघ 200 पार धावसंख्या उभारेल असे वाटत होते. पण अर्शदीपने घेतलेल्या 5 विकेट आणि इतर गोलंदाजांनी त्याला दिलेली साथ यामुळे पंजाबने राजस्थानला 185 धावांवर रोखले.