IPL 2022: दिल्ली-पंजाब लढत ब्रेबॉर्नवर, पण सामन्याअगोदर कोरोना चाचणी होणार

मुंबई : कोरोनाचे रुग्ण वाढलेल्या दिल्ली संघाचा पंजाब किंग्जविरुद्ध आज पुण्यात होणारा सामना आता मुंबईत ब्रेबॉर्न स्टेडियमवर नियोजित करण्यात आला आहे; मात्र सामन्यावरचे अनिश्चिततेचे सावट कायम आहे. या लढतीअगोदर सकाळी दिल्लीच्या सर्व खेळाडूंची पुन्हा आरटीपीसीआर चाचणी होणार आहे. नंतरच सामन्याचे भवितव्य निश्चित होईल.

आरोग्याच्या सुरक्षिततेची चोख व्यवस्था असतानाही दिल्ली संघात कोरोनाने शिकराव केला. मिशेल मार्श या खेळाडूसह सपोर्ट स्टाफमधील चौघे जण बाधित झाले आणि आयपीएल प्रशासनासमोर अडचणी उभ्या राहिल्या आहेत. हा सामना पूर्वनियोजित कार्यक्रमानुसार पुण्यात होणार आहे, पण सध्यस्थितीत प्रवास धोक्याचा ठरू शकतो या कारणामुळे ही लढत मुंबईत ब्रेबॉर्न स्टेडियमवर खेळण्याचा निर्णय बीसीसीआयने घेतला आहे.(IPL 2022 Today Match)

दिल्लीचा संपूर्ण संघ विलगीकरणात आहे, त्यांची दररोज चाचणी करण्यात येत आहे. मिशेल मार्शचा अपवाद वगळता इतर कोणताही खेळाडू बाधित झालेला नाही. प्रत्येकाची चाचणी निगेटिव्ह येत आहे, परंतु उद्या सामन्याच्या दिवशी सकाळी सर्वांची पुन्हा आरटीपीसीआर चाचणी करण्यात येईल, ती निगेटिव्ह आल्यावर सामना पार पडेल, असे बीसीसीआयकडून सांगण्यात आले.

फिजिओ पॅट्रिक फरहाद कोरोनाबाधित झाल्याचे स्पष्ट झाल्यावर १६ तारखेपासून दिल्ली संघातील सर्वांची दररोज चाचणी करण्यात येत आहे.

पंजाबचा संघही मुंबईत

बुधवारी होणाऱ्या या सामन्यासाठी पंजाबचा संघ मंगळवारी पुण्यात दाखल होणार होता, परंतु आता त्यांनाही मुंबईतच राहण्यास सांगण्यात आले आहे. आमचे वास्तव्य मुंबईतच असून आम्ही येथेच सराव करत आहोत, असे पंजाब संघाकडून सांगण्यात आले.