कोलकतासाठी आरपारची लढाई, हैदराबादविरुद्ध आज सामना | IPL Today Match KKR vs SRH | Sakal
sakal

बोलून बातमी शोधा

IPL Today Match KKR vs SRH

कोलकतासाठी आरपारची लढाई, हैदराबादविरुद्ध आज सामना

IPL 2022: सलग पाच विजय मिळवल्यानंतर सलग चार पराभवांची कुऱ्हाड स्वतःच्याच पायावर चालवणाऱ्या सनरायझर्स हैदराबादसाठी आत्ता नाही तर कधीच नाही, अशी परिस्थिती निर्माण झाली आहे. आज त्यांचा सामना त्यांच्याएवढेच गुण असलेल्या कोलकताविरुद्ध होत आहे. कोलकतासाठीही हा सामना जिंकणे अनिवार्य आहे. (IPL Today Match KKR vs SRH)

केन विल्यम्सनच्या नेतृत्वाखाली खेळणाऱ्या हैदराबादची कामगिरी ‘खाईन तर तुपाशी, नाही तर उपाशी’ अशाच प्रकारची राहिली आहे. पहिल्या दोन सामन्यात पराभव, नंतर पाच विजय आणि आत्ता सलग चार पराभव. त्यामुळे स्वतःहून त्यांनी अडचणी निर्माण केल्या आहेत; पण आता प्लेऑफसाठी आव्हान कायम ठेवायचे असेल, तर विजयाशिवाय पर्याय नाही.

हेही वाचा: टीम इंडियामध्ये यॉर्कर किंग बुमराहची जागा धोक्यात? 'या' गोलंदाजाची होणार एन्ट्री!

अगोदरच्या सामन्यात मुंबई इंडियन्सकडून जीवदान मिळालेल्या कोलकता संघावरची टांगती तलवार अजूनही कायम आहे. हैदराबादपेक्षा त्यांचा एक सामना अधिक झाला आहे. १२ सामन्यांतून १० गुण अशी त्यांची स्थिती आहे. त्यात निव्वळ सरासरीही (-०.०५७) अशी आहे. म्हणजेच केवळ विजय अनिवार्य आहेच, असे नाही, तर सरासरी उंचावण्याचे आव्हान त्यांच्यासमोर आहे.

एकापेक्षा एक चांगले खेळाडू असूनही कोलकताची गाडी रुळावर येत नव्हती. अचूक संघ निवडतानाच त्यांची गडबड होत होती. अखेर मुंबईविरुद्धच्या सामन्यात पाच बदल केले. १२ सामन्यांत अंतिम संघात २२ बदल करण्याचा विक्रम त्यांनी या वेळी केला. अखेर योग्य काँबिनेशन जुळल्याचे त्यांनी मुंबईवरील विजयातून सिद्ध केले; परंतु त्या सामन्यात तीन विकेट मिळवणारा पॅट कमिंस दुखापतीमुळे आयपीएलमधून बाहेर गेला आहे. त्यामुळे उद्याच्या सामन्यात आणखी एक बदल करण्याशिवाय त्यांच्याकडे पर्याय नसेल.

हेही वाचा: VIDEO: कोहली माणसावर नाही तर 'देवावर' नाराज; आकाशात पाहिल्यानंतर म्हणाला...

व्यंकटेश अय्यर आणि अजिंक्य रहाणे ही सलामीची जोडी पुन्हा एकत्र आली आहे. मुंबईविरुद्ध त्यांनी ६० धावांची सलामी दिली होती, तरीही कोलकताला १६५ धावाच करता आल्या होत्या. बुमराच्या पाच विकेटने त्यांचे कंबरडे मोडले होते. त्यातून कोलकताच्या फलंदाजांना बोध घ्यावा लागेल.

गोलंदाजीत सुधारणा हवी

हैदराबाद संघाला दुखापतींनी घेरले. वॉशिंग्टन सुंदरपाठोपाठ हुकमी टी. नटराजनला दुखापती झाल्या. त्याचबरोबर सर्वात वेगवान उमरान मलिकचा फॉर्म हरपला. त्यामुळे हैदराबादची गोलंदाजी एकदमच कमकुवत झाली आहे. गुजरातविरुद्ध त्यांचे गोलंदाज १९५ धावांचे संरक्षण करू शकले नव्हते, तर गेल्या तीन सामन्यांत चेन्नईविरुद्ध २०२, बंगळूरविरुद्ध १९२; तर दिल्लीविरुद्ध २०७ धावांची उधळण त्यांच्या गोलंदाजांनी केली. यावरून हैदराबादला गोलंदाजीत फार मोठी सुधारणा करावी लागणार आहे.

Web Title: Ipl Today Match Kkr Vs Srh Match 61 Pitch Report In Marathi

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
टॅग्स :marathiIPLKKRSRHIPL 2022
go to top