धोनीने शेवटच्या सामन्यात पुढच्या हंगामाबाबत दिले 'महत्वाचे' संकेत

मुंबई : चेन्नई सुपर किंग्ज आज आयपीएलच्या 15 व्या हंगामातील आपला शेवटचा सामना खेळत आहे. हा सामना सुरू होण्यापूर्वीच धोनी पुढच्या हंगामात दिसणार की नाही याबाबत चर्चा सुरू झाली होती. आजच्या सामन्यात धोनी नाणेफेक करण्यासाठी आला त्यावेळी त्याने आपण पुढच्या हंगामात पिवळ्या जर्सीत दिसणार की नाही याचा खुलासा केला. त्याने मागे एकदा केलेल्या वक्तव्याचाच पुनरूच्चार केला.

महेंद्रसिंह धोनी नाणेफेक करण्यासाठी आला. त्याने नाणेफेक जिंकली आणि आजच्या सामन्यात काय बदल असतील हे सांगितले. त्यानंतर इयान बिशप यांनी धोनीला मिलियन डॉलर प्रश्न विचारला. धोनी पुढच्या हंगामात दिसणार का? यावर धोनी म्हणाला की नक्कीच मी 2023 ची आयपीएल खेळणार. याचं कराण म्हणजे जर मी चेन्नईत खेळलो नाही आणि आयपीएलला बाय बाय केलं तर ते चाहत्यांच्या बाबतीत योग्य ठरणार नाही. मुंबईत देखील मला आणि संघाला देखील खूप प्रेम मिळालं आहे. मात्र चेन्नईच्या फॅन्सना मी चेन्नईत न खेळणं चांगल वाटणार नाही.'

चेन्नई यापूर्वीच प्ले ऑफच्या शर्यतीतून बाहेर गेली आहे. मात्र राजस्थानला प्ले ऑफमधील आपले स्थान पक्के करण्याची संधी आहे. राजस्थान रॉयल्सने आतापर्यंत 13 सामन्यात 8 सामने जिंकून 16 गुण मिळवले आहेत. ते चांगल्या रनरेटच्या जोरावर गुणतालिकेत तिसऱ्या स्थानावर आहेत. जर त्यांनी आजचा सामना जिंकला तर ते 18 गुण मिळवून दुसऱ्या स्थानावर जाऊ शकतात. जर चेन्नईने आज राजस्थानचा पराभव केला आणि दिल्लीने मुंबईला पराभूत केले तर गुणतालिकेतील तिसऱ्या आणि चौथ्या स्थानाचा फैसला रनरेटवर होईल.