Ishan Kishan : क्रिकेटमधून ब्रेक... किशनने कसोटी मालिकेतून माघार घेण्याचं वैयक्तिक नाही तर मानसिक कारण?

Ishan Kishan Mental Fatigue : भारत आणि दक्षिण आफ्रिका यांच्यातील दोन कसोटी सामन्यांची मालिका 26 डिसेंबरपासून सुरू होत आहे. या मालिकेसाठी भारतीय संघ दक्षिण आफ्रिकेत दाखल झाला आहे. मात्र या संघात भारताचे तीन प्रमुख खेळाडू खेळत नाहीयेत.

ऋतुराज गायकवाडच्या बोटाला दुखापत झाल्याने तो कसोटी मालिकेला मुकणार आहे. मोहम्मद शमी देखील दुखापतीमुळे दक्षिण आफ्रिका दौऱ्यावर भारतीय संघासोबत नाहीये. याचबरोबर इशान किशनने देखील दक्षिण आफ्रिका दौऱ्यातून माघार घेतली आहे. त्याने यासाठी वैयक्तिक कारण दिलं आहे.

मात्र बीसीसीआयने इशान किशनने दौऱ्यातून का माघार घेतील आहे हे स्पष्ट केलेलं नाही. इंडियन एक्सप्रेसने दिलेल्या माहितीनुसार इशान किशनने मानसिक थकवा आल्याने दक्षिण आफ्रिकेच्या मालिकेतून माघार घेतली आहे. तो क्रिकेट मालिकेसाठी सातत्याने प्रवास करत आहे.

इंडियन एक्सप्रेसच्या सूत्रांनी सांगितले की, 'व्यवस्थापनाला इशान किशनने सांगितले की त्याला मानसिक थकवा आला आहे आणि त्याला क्रिकेटमधून काही काळ ब्रेक हवा आहे.'

इशान किशन हा गेल्या वर्षभरापासून भारतीय संघासोबत आहे. त्याला प्लेईंग 11 मध्ये खेळण्याची म्हणावी तशी संधी मिळाली नाही. त्याला वर्ल्डकपमध्ये देखील दोनच सामने खेळण्याची संधी मिळाली. शुभमन गिलला डेंग्यू झाल्याने त्याला संधी मिळाली होती.

बीसीसीआयने इशान किशनने दक्षिण आफ्रिका दौऱ्यावरील कसोटी मालिकेतून वैयक्तिक कारणाने माघार घेतल्याचे सांगिले होते.

बीसीसीआय सचिव जय शहा यांनी प्रसिद्ध केलेल्या पत्राकात, 'इशान किशनने बीसीसीआयकडे त्याला दक्षिण आफ्रिका दौऱ्यावरील कसोटी मालिकेतून वैयक्तिक करणाने रिलीज करण्यात यावं अशी विनंती केली होती. त्याने कसोटी मालिकेतून माघार घेतली आहे.'

(Sports Latest News)