Jasprit Bumrah Injury : T20 विश्वचषकापूर्वी भारतीय संघाला मोठा धक्का, जसप्रीत बुमराह जखमी

Jasprit Bumrah Injury : दक्षिण आफ्रिकेविरुद्धच्या टी-20 मालिकेतील पहिल्या सामन्यात भारतीय संघाला मोठा धक्का बसला आहे. टीमचा कर्णधार रोहित शर्माने नाणेफेकदरम्यान सांगितले की, स्टार वेगवान गोलंदाज जसप्रीत बुमराहला पुन्हा दुखापत झाली आहे. तो मालिकेतील पहिला सामना खेळणार नाही. त्याची दुखापत किती गंभीर आहे याबाबत कोणतीही माहिती देण्यात आलेली नसली तरी टी-20 विश्वचषकापूर्वी बुमराहची वारंवार होणारी दुखापत हा भारतासाठी चिंतेचा विषय आहे.

बुमराहला मंगळवारी सराव सत्रादरम्यान पाठदुखीचा त्रास झाल्याचे बीसीसीआयकडून सांगण्यात आले आहे. यानंतर तो दक्षिण आफ्रिकेविरुद्धच्या पहिल्या टी-20 सामन्यातून बाहेर पडला आहे. बीसीसीआयचे वैद्यकीय पथक त्यांची देखभाल करत आहे.

ऑस्ट्रेलियाविरुद्धच्या मालिकेतही बुमराह पहिला सामना खेळला नाही. यानंतर त्याच्या तंदुरुस्तीबाबत भरपूर प्रश्नचिन्ह उपस्थित झाले. दुसऱ्या आणि तिसऱ्या सामन्यात त्याला संघात स्थान देण्यात आले होते, मात्र तो त्याच्या क्षमतेनुसार कामगिरी करू शकला नाही. बुमराहने दोन टी-20 सामन्यांमध्ये एकूण सहा षटके टाकली आणि 73 धावा दिल्या. यादरम्यान त्याला एकच विकेट मिळाली. याआधी दुखापतीमुळे तो आशिया कपमध्येही खेळला नव्हता.

टी-20 विश्वचषकाच्या दृष्टीने जसप्रीत हा भारताचा सर्वात महत्त्वाचा गोलंदाज आहे. पण यावर्षी भारतासाठी तो फक्त पाच टी-20 सामने खेळला आहे. श्रीलंकेविरुद्ध दोन सामने जसप्रीत खेळला होता. गेल्या तीन महिन्यांत तो केवळ तीन सामने खेळला आहे. इंग्लंडविरुद्ध त्याने दोन विकेट्स घेतल्या, पण गेल्या दोन सामन्यांत तो खूप महागात पडला आहे. भारताच्या स्टार गोलंदाजाची ही कामगिरी आणि खराब फिटनेस ही संघासाठी मोठी चिंतेची बाब आहे.