Junior Women Hockey : भारताच्या ज्युनियर महिला हॉकी संघाने दक्षिण कोरियाला बरोबरीत रोखले

काकामिगहारा (जपान) : भारताच्या ज्युनियर महिला हॉकी संघाने दक्षिण कोरियाला बरोबरीत रोखले. दक्षिण कोरियाने पहिल्या ३० मिनिटांमध्ये गोल करीत आघाडी घेतली होती. त्यानंतर भारताच्या दीपिका सोरेंग व दीपिका यांनी शानदार गोल करीत भारतीय संघाला २-२ अशी बरोबरी साधून दिली.

भारतीय संघाने सात गुणांसह सरस गोलफरकाच्या जोरावर ज्युनियर आशियाई हॉकी करंडकाच्या अ गटातील गुणतालिकेत पहिले स्थान पटकावले आहे. दक्षिण कोरियानेही ७ गुणांचीच कमाई केली असून त्यांचा संघ दुसऱ्या स्थानावर आहे.

भारत-दक्षिण कोरिया यांच्यामधील लढतीच्या पहिल्या क्वॉटरमध्ये कोरियाच्या खेळाडूंचेच वर्चस्व दिसून आले. दोन पेनल्टी कॉर्नरही त्यांना मिळाले, पण यावर गोल करण्यात त्यांना अपयश आले. अखेर १५ व्या मिनिटाला युजीन ली हिने ‘डी’ विभागाच्या आतमधून फिल्ड गोल करून दक्षिण कोरियाला १-० अशी आघाडी मिळवून दिली.

दुसऱ्या क्वॉटरमध्ये सुरुवातीला कोरियाच्या खेळाडूंनी आक्रमक खेळ करायला सुरुवात केली. पण भारतीय खेळाडूंनी तोडीसतोड आक्रमण करीत दक्षिण कोरियावर दबाव वाढवण्याचा प्रयत्न केला. दक्षिण कोरियाने मात्र भारतावरील आक्रमण कायम ठेवले. जियोन चोई हिने ३० व्या मिनिटाला गोल करीत दक्षिण कोरियासाठी दुसरा गोल केला. दुसऱ्या क्वॉटरनंतर दक्षिण कोरियाकडे २-० अशी आघाडी झाली.

शानदार गोलांनी बरोबरी

पहिल्या दोन क्वॉटरमध्येकोरियाने बाजी मारल्यानंतर भारतीय संघाने पुढील दोन क्वॉटरमध्ये पुनरागमन केले.