Lionel Messi : मेस्सी भारतात येणार... प्रत्यक्ष खेळताना पाहण्याची चाहत्यांना मिळणार दोनदा संधी?

Lionel Messi Visit India : अर्जेंटिनाला वर्ल्डकप जिंकून देणाऱ्या लिओनेल मेस्सीचे भारतात तुफान फॅन फॉलोईंग आहे. याची प्रचिती खुद्द मेस्सीला कतारमध्ये झालेल्या वर्ल्डकपदरम्यान आली होती. तेव्हापासूनच लिओनेल मेस्सी हा भारतात कधी येणार याची चर्चा सुरू होती. आता लिओनेल मेस्सी भारतात येण्याच्या आशा पल्लवीत झाल्या आहेत.

केरळ अर्जेंटिनासोबतच्या दोन मैत्रीपूर्ण सामन्यांचे आयोजन करण्याची शक्यता आहे. या सामन्यात लिओनेल मेस्सी देखील खेळण्याची शक्यता आहे. हे सामने 2025 च्या ऑक्टोबरमध्ये होण्याची शक्यता आहे.

अर्जेंटिनाचा संघ केरळमध्ये दोन सामने खेळणार आहे. हे सामने तो भारतीय फुटबॉल संघासोबत खेळणार असल्याचा अंदाज वर्तवला जात आहे. याबाबतची माहिती केरळचे क्रीडामंत्री व्ही अबदुराहिमान यांनी दिली आहे.

या घोषणेसोबतच त्यांनी सांगितले की अर्जेंटिना फुटबॉल असोसिएशनसोबत ऑनलाईन चर्चा सुरू आहे. यात मुख्य प्रशिक्षक पाब्लो डिआज आणि केरळ क्रीडा मंत्रालयाचे सचिव प्रणबज्योती नाथ आणि केरळ फुटबॉल असोसिएशनचे अध्यक्ष नवास मीरन यांचा देखील समावेश आहे.

केरळच्या क्रीडामंत्र्यांनी फेसबूकवरून याची माहिती दिली. ते लिहितात, 'विश्वविजेता संघ अर्जेंटिनाला केरळमधून खूप पाठिंबा मिळाला आहे. त्यांना देखील हे माहिती आहे. त्यांनी भारतात येण्याची आपली विनंती मान्य केली आहे.'

अर्जेंटिना फुटबॉल असोसिएशन केरळ फुटबॉल असोसिएशनसोबत संयुक्तरित्या काम करण्यास उत्सुक आहे. याअंतर्गत केरळमधील 5000 विद्यार्थ्यांना फुटबॉल प्रशिक्षण देण्याचा उद्येश आहे.

यापूर्वी जून 2024 मध्ये अर्जेंटिनाचा संघ भारतात येणार होता. मात्र यामध्ये बदल झाला असून पावसाळ्याचा हंगाम पाहता अर्जेंटिना ऑक्टोबर 2025 मध्ये भारतात येण्याची शक्यता आहे.

(Sports Latest News)