Malaysia Open | पहिल्या फेरीत सिंधूचा विजय सायनाचा पराभव

Malaysia Open : भारताच्या दोन अव्वल बॅडमिंटनपटू पीव्ही सिंधू आणि सायना नेहवाल यांचे मलेशिया ओपन सुपर 750 मधील पहिल्या फेरीचे सामने आज झाले. यामध्ये पीव्ही सिंधूने (PV Sindhu) विजय मिळवला तर लंडन ऑलिम्पिक कांस्य पदक विजेत्या सायना नेहवालला पराभवाचा धक्का सहन करावा लागला. (Malaysia Open Super 750 tournament PV Sindhu Won Saina Nehwal Lost In First Round)

माजी वर्ल्ड चॅम्पियन सिंधूने थायलंडच्या जागतिक क्रमवारीत 10 व्या स्थानावर असलेल्या चोचुवांगचा 21-13, 21-17 अशा सरळ गेममध्ये पराभव केला. तर दुसरीकडे लंडन ऑलिम्पिक स्पर्धेत कांस्य पदकाची कमाई करणाऱ्या सायना नेहवालचा (Saina Nehwal) जागतिक क्रमवारीत 33 व्या क्रमांकावर असणाऱ्या अमेरिकेच्या आयरिस वांगने 11-21 17-21 असा पराभव केला.

सातव्या स्थानावर असणारी सिंधू आता थायलंडच्या 21 वर्षाच्या चैवानशी लढणार आहे. जागतिक ज्यूनियर रँकिंगमध्ये चैवान अव्वल स्थानावर होती. याचबरोबर बँकॉकमध्ये झालेल्या उबर कपमध्ये कांस्य पदक मिळवणाऱ्या संघात देखील तिचा समावेश होता.

दुसरीकडे बी सुमित रेड्डी आणि अश्विनी पोनप्पा या जोडीला देखील पराभवाचा सामना करावा लागला. जागतिक क्रमवारीत 21 व्या स्थानावर असलेल्या रॉबिन टाबलिंग आणि सेलेना पेक या नेदरलँडच्या जोडीने भारतीय जोडीचा 15-21, 21-19, 17-21 असा पराभव केला. हा सामना 52 मिनिटे चालला.