ISL 2024: मुंबई सिटी ठरले चॅम्पियन! अंतिम सामन्यात मोहन बगानला चारली पराभवाची धूळ

Mumbai City FC ISL 2024 Winner: इंडियन सुपर लीग 2023-24 स्पर्धेचे विजेतेपद मुंबई सिटी एफसीने पटकावले आहे. कोलकातामधील सॉल्ट लेक स्टेडियमवर झालेल्या अंतिम सामन्यात मुंबईने मोहन बगान सुपर जायंट्सला 3-1 अशा गोलफरकाने पराभवाचा धक्का दिला.

मुंबई सिटीने इंडियन सुपर लीगचे विजेतेपद मिळवण्याची ही दुसरी वेळ होती. यापूर्वी त्यांनी 2020-21 मध्ये विजेतेपद जिंकले होते.

काही दिवसांपूर्वीच मोहन बगानने मुंबईला मागे टाकत पाँइंट्स-टेबलमध्ये अव्वल क्रमांक मिळवत आयएसएल शिल्ड जिंकली होती. परंतु आता अंतिम सामन्यात त्यांना मुंबईने पराभूत करत विजेतेपदाला गवसणी घातली.

अंतिम सामन्यात सुरुवातीला दोन्ही संघांनी एकमेकांना तगडी लढत दिली होती. पण तरी मोहन बगानने आघाडी घेण्यात यश मिळवले होते. 44 व्या मिनिटाला जेसन कमिंग्सने मोहन बगानसाठी पहिला गोल नोंदवला होता. त्यामुळे पहिला हाफ संपला, तेव्हा मोहन बगान आघाडीवर होते.

मात्र, दुसऱ्या हाफमध्ये मुंबईने दमदार पुनरागमन केले. 53 व्या मिनिटाला जॉर्ज पेरेयरा दियाझने मुंबईला बरोबरी साधून दिली. त्याला हा गोल नोंदवण्यासाठी अल्बर्टो नोग्युएराने असिस्ट केले.

त्यानंतर बिपीन सिंगने सामना संपण्यासाठी 9 मिनिटे राहिले असताना गोल करत मुंबईला आघाडीवर नेले. सामन्यातील निर्धारित 90 मिनिटे झाली, तेव्हा मुंबई 2-1 अशा फरकाने आघाडीवर होते.

त्यानंतर रेफ्रीने 9 मिनिटे भरपाई वेळ वाढवला. त्यावेळी 97 व्या मिनिटाला जेकब वोजटसने मुंबईसाठी तिसरा गोल करत विजय निश्चित केला. सामना संपल्यानंतर मुंबई सिटीने जोरदार सेलीब्रेशन केले.

दरम्यान, या संपूर्ण सामन्यात चेंडूवर 58 टक्के ताबा मुंबई सिटी एफसीचा होता, तर 42 टक्के ताबा मोहन बगानवर होता. या सामन्यातील मोहन बगानच्या पराभवामुळे मात्र कोलकातामधील फुटबॉल चाहते चांगलेच नाराज झाले. अनेकांनी सामना संपण्यापूर्वीच स्टेडियममधून बाहेर पडणे पसंत केले.