माजी भारतीय क्रिकेटरच्या वडिलांना अटक, बँक फसवणूकीचा आरोप

क्रिकेट जगतातून धक्कादायक माहिती समोर आली आहे. भारतीय संघाचा माजी खेळाडू असलेल्या नमन ओझा याच्या वडिलांना बँक फसवणुकीप्रकरणी अटक करण्यात आली आहे. अटकेनंतर जामीन अर्ज दाखल करण्यात आला असून तो फेटाळण्यात आला आहे.

मिळालेल्या माहितीनुसार, विनय ओझा यांना पोलिसांनी बँक फसवणूक प्रकरणात अटक केली आहे. त्यांच्यावर बँक ऑफ महाराष्ट्रच्या जॉलखेडा शाखेत २०१४ मध्ये झालेल्या जवळपास १.२५ कोटी रुपयांच्या फसवणुकीचा गुन्हा आहे. पोलिसांनी त्यांच्यावर ४०९, ४२०, ४६७, ४६८, ४७१, १२०बी, ३४ आणि आयटी कलम ६५,६६अंतर्गत गुन्हा दाखल केला होता.

२०१४ मध्ये गुन्हा दाखल झाल्यानंतर विनय ओझा फरार होते. गेली आठ वर्ष पोलिस त्यांची चौकशी करत होते. २०१३मध्ये बँक ऑफ महाराष्ट्रच्या जॉलखेडा शाखेत शाखा प्रमुख अभिषेक रत्नम यांनी फसवणुकीची योजना आखली होती. मात्र, त्याची बदली झाल्यानंतर ओझा आणि इतरांनी मिळून जून २०१३मध्ये जवळपास ३४ बनावट खाते उघडून यावर केसीसी कर्ज हस्तांतरित करत जवळपास सव्वा कोटी रुपयांचा घोटाळा केला होता. ज्यावेळी ही हेराफेरी झाली, त्यावेळी ओझा हे शाखा प्रमुख होते.

यानंतर एक वर्षानंतर त्यांच्याविरोधात तत्कालीन शाखा प्रमुख रितेश चतुर्वेदी यांनी फसवणुकीची तक्रार नोंदवली होती. नावट नावे आणि फोटोंच्या आधारावर शेतकरी क्रेडिट कार्ड बनवून बँकेतून पैशांचा व्यवहार करण्यात आला आहे. असे तक्रारीमध्ये नोंदवले आहे.

नमन ओझा प्रसिद्ध क्रिकेटपटू

विनय ओझा यांचा मुलगा नमन ओझा हा भारतातील प्रसिद्ध क्रिकेटपटू आहे. त्याने आपल्या कारकिर्दीत १ कसोटी, १ वनडे आणि २ टी२० आंतरराष्ट्रीय सामने खेळले आहेत. याशिवाय त्याने ११३ आयपीएल सामनेही खेळले आहेत.

नमनने कसोटीत ५६ धावा, वनडे सामन्यात १ धाव आणि टी२० मध्ये १२ धावा केल्या आहेत. त्याने ११३ आयपीएल सामन्यात फलंदाजी करताना २०.७२च्या सरासरीने १५५४ धावा चोपल्या आहे. या धावा करताना त्याने ६ अर्धशतकेही चोपली आहेत.