National Sports Competition : बॅडमिंटनमध्ये महाराष्ट्राला रौप्यपदकावर समाधान

पणजी - गोव्यात सुरू झालेल्या राष्ट्रीय क्रीडा स्पर्धेतील बॅडमिंटनमध्ये सांघिक प्रकारात महाराष्ट्राच्या पुरुष आणि महिला संघांना रौप्यपदकावर समाधान मानावे लागले. पुरुषांच्या अंतिम सामन्यात कर्नाटकने सुवर्णपदक जिंकताना महाराष्ट्राचा ३-१ असा पराभव केला. महिलांच्या अंतिम सामन्यात आसामने महाराष्ट्राला ३-० असे नमवले.

पुरुष अंतिम लढतीत कर्नाटकच्या एस. भार्गव याने हर्षील दाणी याला तासभर चाललेल्या चुरशीच्या लढतीत १८-२१, २१-१९, २१-१५ असे नमवून कर्नाटकला १-० अशी आघाडी मिळवून दिली. दुसऱ्या एकेरीत रोहन गुरबानी याने पृथ्वी रॉय याची झुंज ४८ मिनिटांत मोडून काढताना २३-२१, २२-२४, २१-१४ असे नमवून महाराष्ट्राला १-१ अशी बरोबरी साधून दिली.

दुहेरीत कर्नाटकच्या जोडीची सरशी झाली. एच. व्ही. नितीन व के. साई प्रतीक जोडीने महाराष्ट्राच्या दीप रंभिया व अक्षण शेट्टी जोडीला २१-१२, २१-१४ असे नमवून कर्नाटकला २-१ अशी आघाडी मिळवून दिली. अंतिम लढतीतील तिसऱ्या एकेरीत आयुष शेट्टी याने दर्शन पुजारी याला २१-१६, २१-१७ असे ३६ मिनिटांत नमवले.

महिलांच्या अंतिम सामन्यात आसामने महाराष्ट्राचा ३-० असा पराभव केला. अंतिम लढतीत अश्मिता चलिहा हिने आसामला १-० अशी आघाडी मिळवून दिली. तिने महाराष्ट्राच्या पूर्वा बर्वे हिला २१-१६, २१-११ असे ३३ मिनिटांत नमवले.

दुसऱ्या एकेरीत ईशारानी बरुआ हिने आलिशा नाईक हिला पहिला गेम गमावल्यानंतर ४० मिनिटांत ९-२१, २१-१३, २१-१८ असे पराजित केले. २-० या आघाडीनंतर दुहेरीत बाजी मारत आसामने सुवर्णपदक निश्चित केले. दुहेरीत ईशारानी व अश्मिता जोडीने सिमरन सिंघी व रितिका ठाकर जोडीला २१-१९, २१-१३ असे नमवून आसामच्या स्पर्धेतील पहिल्या सुवर्णपदकावर शिक्कामोर्तब केले.