Car Rally : स्टेअरिंग खराब होऊनही निकिताने पटकाविला तिसरा क्रमांक

हडपसर - कोहिमा, नागालँड येथे झालेल्या इंडियन नॅशनल रॅली चॅम्पियनशिप कार रॅलीने नुकताच या वर्षीचा हंगाम संपवला. अतिशय अटीतटीच्या या स्पर्धेत स्टेअरिंग खराब होऊन व चावी तुटूनही माघार न घेता येथील निकिता टकले-खडसरे ने चांगला परफॉर्मन्स दाखवत तिसरा क्रमांक पटकाविला. रॅलीचे आयोजन नागालँड ऍडव्हेंचर क्लबने केले होते.

नागालँडमध्ये अनुभवी चालक चेतन शिवरामने पहिला क्रमांक पटकावला आणि तो इंडियन नॅशनल रॅली चॅम्पियनशिप-२ श्रेणीतील एकूण रॅलीत दुसरा सर्वोत्तम ठरला. कोहिमा येथे अर्णव प्रताप सिंग अव्वल ठरला. ज्युनिअर इंडियन नॅशनल रॅली चॅम्पियनशिप श्रेणीत त्याने पोडियम आणि दुसरा क्रमांक पटकावला. तर निकिता टक्कले खडसरेने तिसरा क्रमांक पटकाविला.

नागालँड कोहिमा येथे झालेल्या रॅलीत स्पर्धेकांना अनेक आव्हानांना सामोरे जावे लागले, यामध्ये कडाक्याची थंडी, त्यात इंजिन समस्यांमुळे गाड्या सुरु झाल्या नाहीत, धुके असल्याने वाहने धडकली. पहिल्याच दिवशी दहा स्पर्धक रॅलीतून बाहेर पडले. दुसऱ्या दिवशी साधारण सुमारे अठ्ठावीस स्पर्धक सहभागी झाले होते. या रॅलीत भारतातून सुमारे सत्तर कार रॅली स्पर्धक सहभागी झाले होते. अनेकांना अडचणी आल्याने सहभागी होऊ शकले नाहीत.

निकिताने वयाच्या अवघ्या १८ व्या वर्षापासून कार रॅलीमध्ये सहभाग घेण्यास सुरुवात केली. अल्पावधीतच भारतात झालेल्या अनेक स्पर्धांमध्ये दिग्गज अनुभवी स्पर्धक सहभागी असताना नवख्या निकिताने प्रत्येक स्पर्धेत आपली चमक दाखवली. तिच्या या यशाबद्दल सर्वत्र तिचे कौतुक होत आहे. निकिताच्या या यशाचे श्रेय ती वडील उद्योजक नितीन टकले, पती शुभम खडसरे, कुटुंबीय व तिचे मार्गदर्शक चेतन शिवराम यांना देते.

यावर्षी निकिता इंडियन नॅशनल आटो क्रॉस चॅम्पियनशिप सह सहा ते सात रॅली मध्ये सहभागी होणार आहे. आगामी स्पर्धेत भारत व परदेशात होणाऱ्या रॅलीत यश मिळविण्याचा संकल्प निकिताने व्यक्त केला आहे.