ICC T-20 संघात भारताचा एकही खेळाडू नाही

दुबई : आयसीसीकडून बुधवारी २०२१ मधील सर्वोत्तम ट्वेन्टी-२० संघांची निवड करण्यात आली. यामध्ये भारताच्या एकाही क्रिकेटपटूला स्थान देण्यात आलेले नाही. पाकिस्तानचा बाबर आझमकडे या ट्वेन्टी-२० संघाचे नेतृत्व सोपवण्यात आले आहे. (No Indian Player in ICCs Team of The Tournament Babar Azam)

विराट कोहलीच्या नेतृत्वात भारतीय क्रिकेट संघाला ट्वेन्टी-२० विश्‍वकरंडकात साखळी फेरीच्या लढतीतच गारद व्हावे लागले होते. या निराशाजनक कामगिरीचा फटका भारतीय क्रिकेटपटूंना यावेळी बसला.

तर दुसरीकडे बाबर आझमच्या नेतृत्वात पाकिस्तानने ट्वेन्टी-२० विश्‍वकरंडकाच्या उपांत्य फेरीपर्यंत मजल मारली होती. शिवाय त्याने २०२१ मधील २९ सामन्यांमध्ये ३७.५६च्या सरासरीने ९३९ धावांचा पाऊस पाडला. यामध्ये एक शतक व नऊ अर्धशतकांचा समावेश होता.

आयसीसीकडून निवडण्यात आलेल्या या संघात पाकिस्तानच्या तीन खेळाडूंचा समावेश आहे. यामध्ये बाबर, महम्मद रिझवान व शाहीन आफ्रिदीचा समावेश आहे. तसेच मिचेल मार्श व जोश हेझलवूड या दोन ऑस्ट्रेलियन खेळाडूंनाही यामध्ये स्थान देण्यात आले आहे.

आयसीसीची ट्वेन्टी-२० संघ : जोस बटलर, महम्मद रिझवान, बाबर आझम, एडन मार्करम, मिचेल मार्श, डेव्हीड मिलर, तबरेझ शम्सी, जोश हेझलवूड, वनींदू हसारंगा, मुस्तफिजुर रहमान, शाहीन आफ्रिदी.